13/03/2024 16:56
《小傳日記》長汽都會唔夠氣!離職潮不止皆因管理太離地?
《小傳日記》雖然魚缸今日先升後跌,但成交都有1200億銀以上,而且仲守得住17000,暫時都仲可以觀望住先,就睇埋聽日表現成點。 不過唔夠氣嘅又點止魚缸,長汽(02333)內部疑似仲係上氣唔接下氣,離職潮有增無減。有內媒報道,長汽過年前後,旗下多個品牌內部高層員工都未停過遞信,至少三個副總級以及十個部長級高管走人。 長汽散水潮由上年開始一直未停過,據講係因為老闆魏建軍之故,愈想追數反而愈唔夠數,長汽過去已經連續三年賣車未達股權激勵考核目標,但魏老闆仍然未肯韜光養晦,反而繼續定下進取目標,提出今年銷量要唔少於190萬架。雖然目標清晰,但員工就好大壓力,三年都唔夠數,但老闆偏偏繼續捽數,高管個個都「臣妾做不到呀」。 據講魏老闆嘅內部管治好鐵腕,經常辣更不特止,仲一邊巡一邊手攞電話,一見到有唔妥就打電話問責,有錯要罰錢,仲要連坐法。雖然未至於血汗工廠,但觀乎高管走完一個又一個,可想而知壓力山大。 長汽業績唔達標,兼夾員工散水潮,好明顯係管理出咗問題。據講長汽第二把交椅王鳳英走人跳槽小鵬(09868)之後,長汽蜀中無大將,得返魏老闆御駕親征,公司內部變成一言堂,更加令長汽情況惡化。誠如王鳳英嘅例子,如今汽車業百花盛放,東家唔打可以打西家,如果長汽再任由人才流失,業績就必然會繼續轉差。 公司咩風格就好睇主事人性格,如果魏建軍意識唔到如今已經係危急存亡之秋,再唔變革扭轉劣勢,可能就會恨錯難返,始終神州係無「大到不能倒」,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情