07/06/2024 16:28
《小傳日記》蔚來虧損擴大卻開第三廠,唔通新廠有法寶扭轉劣勢?
《小傳日記》蔚來(09866)昨日收市後公布今年首季業績,季度蝕約52﹒6億人幣,多過舊年同期嘅蝕48億人幣。收入按年跌7﹒2%至99﹒1億人幣,差過市場原本預期嘅按年升1%。業績公布後,大行紛紛唱淡。蔚來股價今日由頭跌到尾,收市跌逾7%,市場明顯對呢份成績表唔收貨。 近年來,代表汽車新勢力嘅「蔚小理」引起市場關注。論風頭,蔚來一向唔輸蝕。但講到業績表現,蔚來明顯落後。以2023年為例,理想汽車(02015)年度收入飆升1﹒7倍,更加首年度扭虧為盈。小鵬汽車(09868)雖然無理想咁標青,收入只升14%,虧損亦多咗13%,不過不失。反觀蔚來,舊年全年收入上升不足13%,但虧損勁升45%,虧損金額更高達211億人幣,三者表現之中最差。 或者係為咗安撫市場嘅不滿情緒,蔚來管理層公布季績後,即刻將焦點轉至第二季前瞻。集團預期第二季汽車交付量介乎5﹒4萬至5﹒6萬架,按年升約1﹒3至1﹒38倍。而收入仲話會升89%至95%,介乎165億至171億人幣。點解第二季可以咁標青?除咗因為4、5月已出售車輛上升之外,仲因為舊年同期收入出現滑鐵盧,收入下跌25%,喺低基數嘅情況下,要錄得大幅增長難度比較低。 不過,前幾日公布嘅集團第三間新廠已經動工,單班產能10萬架。集團喺虧損持續擴大下,繼續投入大量資金增加產能,對管理層來講壓力唔細。唔通新廠用來生產必勝新車,可以令到集團轉蝕為賺?否則,喺支出大增嘅前提下,集團收入升幅若跟唔上支出升幅,隨時令集團虧損進一步擴大,更加唔使諗幾時轉賺。 另外,內地汽車銷售經過舊年嘅高速增長後,5月需求開始出現疲態。根據乘聯會初步統計顯示,內地5月乘用車市場零售只得168﹒5萬架,同比下跌3%。儘管新能源車銷量增幅比傳統燃油車好,仍然錄得升幅。但由於新能源車企之間嘅競爭日益激烈,蔚來嘅未來仍然充滿挑戰。請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票