《魚缸博客》華晨中國（０１１１４）公布，擬派特別股息，每股４﹒３元，相當於上周五收市價７﹒１３元嘅六成。股價今早最多升超過兩成半。以而家８﹒４９元來計，派４﹒３元息即係半賣半送咁滯，認真和味。今次華晨咁大手筆，幅度之大極之罕有，莫講話車企未見過，就算其他藍籌股都極之罕見。　　近年來，汽車股焦點去曬新能源車度，除咗新能源車龍頭比亞迪股份（０１２１１）之外、仲有蔚小理：蔚來（０９８６６）、小鵬汽車（０９８６８）同理想汽車（０２０１５）搶去唔少風頭。甚至後來者小米（０１８１０）都來勢洶洶，都成為一時熱話，相比之下華晨就低調好多。　　低調歸低調，華晨今次平地一聲雷，派息咁重手，唔單只令人意外，仲恨死隔離，唔知今年買咗上述新能源車股嘅投資者有咩感想？以股價８﹒４９元計算，華晨２０２４年至今股價已經累積升超過２倍，表現遠遠?離上述幾隻新能源車股。同期比亞迪股價升大約１２﹒３％，理想 汽車跌約４９﹒６％，小鵬汽車跌４９﹒５％，蔚來跌５３﹒３％。　　不過，就算華晨股價咁標青，博客對於大升嘅股份都有戒心，好消息都已經出曬來，仲有咩可以期待？反而，擔心有投資者趁好消息出貨多啲。不過，如果股價落到８﹒２元樓下，博客或者會考慮下，畢竟都仲有吸引力。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

WoW WoW星期三：精選保健品低至半價！ (只限今天)► 火速行動