27/05/2024 11:26
《魚缸博客》恒大汽車賣幾多錢?復牌升咁多,唔通有好嘢未公布?
《魚缸博客》恒大汽車(00708)公布,本月16日知悉共同及個別清盤人為及代表中國恒大集團(03333)、恒大健康產業集團及Acelin Global Limited統稱嘅潛在賣方,同潛在第三方買方訂立條款書,潛在買賣雙方或就潛在賣方所持該集團股份訂立最終買賣協議。該集團於5月17日停牌,於今日(27日)起恢復買賣。 恒大汽車股價今日開市報0﹒74元,高開接近95%。喺競價時段嘅更一度出現過癲價2000元嘅對盤價,可惜只係曇花一現,但對盤價1000元則維持一段長時間。以1000元對盤價計,相對於停牌前股價0﹒38元嘅2600幾倍,亦意味住公司市值超過10﹒8萬億元,即係相當於三間騰訊(00700)市值,誇張成咁睇怕無幾多個。雖然話競價時段嘅對盤價不受限制,要擺咩價都得。但話曬都係國際金融中心,競價時段咁兒戲,實在有啲講唔過! 講返轉頭,今次潛在買賣雙方訂立嘅協議中,最關鍵嘅成交價格竟然無提及,無端端升咁多實在有啲意外,唔通仲有好嘢未公布?又或者只要有人肯買,只要股票復牌可以買賣,就足以開香檳慶祝,所以今日復牌升咁多?可惜博客手上無貨,唔係就一定食胡先。 有人可能會話,就算間廠停產,機器、廠房點都值啲錢呱。係就係值啲錢,弊在欠債仲多呢。恒大汽車每股資產淨值目前係負3﹒47元,攞錢去買負資產?除非個品牌值錢。但博客個人覺得,個品牌同集團每股淨資產一樣係負值。第日如果真係整咗架車出來(如果有呢一日嘅話),到時話俾人知係恒大出品,你估有幾多人夠膽買?何況而家汽車市場競爭激烈,就連汽車新勢力嘅車企要生存都唔容易,更何況係一家瀕臨清盤嘅車廠?所以,博客諗過度過,覺得都係制唔過。博客如果有貨固之然走夾唔抖放咗先,無貨都唔冒呢個險,免得買完之後瞓唔著,賺咗都補唔返!(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情