16/05/2024 17:01
《小傳日記》海底撈染指學界,開埋飯堂連未來客群都搶埋!
《小傳日記》海底撈(06862)籌謀特海(09658)美國上市,足以見到海底升上神枱依然有意重拾擴張速度,不斷搞多幾瓣,雖然似阿茂整餅,但都係探索緊未來嘅方向。唔只科技公司,海底撈都識投資未來。 早排就有報道提到,佛山有間海底撈分店染指學界,喺舖頭提供埋免費小學補習服務,逢禮拜一至四嘅下晝5點到9點嘅「趕功課高峰期」,都會喺舖頭提供空間畀當日幫襯嘅小學生做功課。由於打著「補習」嘅牌號,大家都知「雙減」過後就連補習社都唔可以做學科補習,海底撈身為火鍋舖居然提供補習服務,所以後來因為傳得太犀利,分店縮沙,出咗無耐就收返埋。不過分店發言人都強調,只係提供空間做功課,而唔涉及專業輔導培訓,更加重要係服務唔收錢,只係同平時嘅附加服務一樣。 做補習係有啲地雷位,不過個別分店措施又邊同總公司方向?近期海底撈就走入校園,喺大學開飯堂,有同學仔就喺小紅提到,近期喺山東外國語職業技術大學入面就出現咗第一間海底撈飯堂。唔同於海底撈門市,做得飯堂梗係要主打平,山東日常菜式牛肉麵一碗都係13銀人仔,餑餑套餐13﹒9銀人仔。但係想打邊爐,做返門市同款菜色同鍋底,仲有全單八折。 其實由上年10月起,海底撈已經陸陸續續喺全國唔同大學入面開返總共30幾間飯堂,銳意培養新一代食海底撈嘅習慣。其實大學飯堂都係「隱藏版」嘅下沉市場,一樣係要做低價市場,但好在地理上並唔係喺三、四線城市,可能喺一、二線城市入面就有。而且雖然係大學入面做學生生意,但將來食慣海底撈飯堂嘅同學仔畢業,自然都會幫襯返海底撈,計落飯堂真係培養習慣嘅好地方,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票