11/07/2024 11:52
《魚缸博客》同行唔同命,「蘿蔔快跑」惹憧憬,如祺出行無運行?
《魚缸博客》恒指今早一度升逾300點,重上10天線,希望今日收市唔會好似昨日咁反覆,時升時跌!除咗大市反覆之外,個股都一樣反覆無常,好似長城汽車(02333)咁,今日發盈喜預料中期多賺3至4倍,股價今早係威係勢,開市無耐就升半成有多。點知十幾分鐘後,形勢逆轉,唔單止早段升幅全數蒸發曬,最差時仲要倒跌近半成。呢一刻雖然跌少左,但今早高位買入嘅散戶真係喊都無謂。 今日除咗隻長城汽車之外,半新股如祺出行(09680)同樣走勢反覆。呢隻股票昨日先掛牌,早前香港公開發售部分認購不足,1467份申請悉數獲分配所申請股份。昨日首掛表現強差人意,收市守唔住35蚊上市價。以每手100股計,未計交易費用,帳面要蝕110蚊。今早開市無幾耐,股價好似食左興奮劑咁,衝上40蚊,如果出貨及時,未計手續費都有500蚊落袋。只可惜好景不常,小散戶或者仲喺度憧憬緊,股價可唔可以更上一層樓時,股價卻反高潮,好快碌返落33蚊樓下,而家仲喺上市價35蚊附近掙扎緊。 查實如祺出行來頭唔細,大股東同廣汽集團(02238)一樣係廣汽工業集團,而第二大股東仲係科技股龍頭騰訊(00700)。集團主要提供網約車服務同其他服務(包括順風車服務以及營銷及推廣服務),覆蓋大灣區廣州、深圳、佛山、中山、東莞及珠海等城市。除有人駕駛網約車服務外,亦為乘客提供無人駕駛網約車服務(Robotaxi服務)。未來網約車同無人駕駛預料將逐漸普及,集團食正呢條水,可以話前途一片光明。唔信?睇下百度(09888)昨日的股價表現就知道,因有大行發表研究報告,指百度旗下無人駕駛服務「蘿蔔快跑」武漢業務,今年有機會達到收支平衡,明年甚至可能產生利潤,百度股價藉勢抽升逾一成。 當然,如祺出行同「蘿蔔快跑」唔完全一樣,只係有部分相類似。但發展路向比較接近,未來都值得期待。不過,始終係新股,現時股價太高定太低真係難以下定論。如果已經一手入左貨,不妨等40蚊樓上先放,如果未入貨,大可以等等先,睇下有無機會穿30蚊先作考慮。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
WoW WoW星期三:健康網購產品低至$99!(只限今天)► 火速行動