09/04/2024 17:08
《小傳日記》官方確認聽日宣布!網易暴雪復合好心好報?
《小傳日記》傳咗好幾個月嘅復合終於成真!今朝起,神州網上就傳緊網易(09999)將會聽日正式宣布暴雪回歸,好多博主急不及待出po。有內媒就此向網易查詢,網易方面都唔兜圈,直認聽日肯定會官宣,網易股價今日都偷步升咗4%。 話說今年初都已經傳緊暴雪呢一年嚟都搵唔到人接手國服,最終都係做生不如做熟要搵返網易,期間暴雪老臣子Bobby Kotick喺上年底正式離任CEO,呢件事成為網易同暴雪降凍嘅一大關鍵,而就喺佢離職之後,就開始有傳網易暴雪復合。 消息傳話暴雪新國服將會由網易互娛廣州營運,而雷火就會負責營銷,後者就已經獲得網易確認,一切只等聽日正式宣布。雷火係網易旗下遊戲工作室,2007年喺杭州成立,目前已經有超過3000名員工。比起開發遊戲,雷火更大程度係網易旗下嘅marketing部門,近期最重要代表作就係《逆水寒》。據網易上年全年業績提到,2023年手遊收入佔比提升,主要就係由於《逆水寒》同《蛋仔派對》等等嘅手遊淨收入佔比增加,證明雷火對於網易收入都有好重要地位。 雷火可以話係網易創新嘅命脈,其中網易嘅AI平台伏羲都係由雷火管理,亦都為遊戲提供唔少AI應用,好似《逆水寒》入面就用到伏羲AI嚟做角色嘅人工生成面孔,亦都創造咗《逆水寒》虛擬偶像「葉問舟」,可以透過語言、表情同肢體動作同玩家交流,提升玩家遊戲體驗。 今日網易有消息都只係升4%,可能係孖屐仲等緊合作詳情,但係暴雪國服回歸,包括《魔獸世界》、《Overwatch》同《爐石戰記》等等遊戲都重見光明,將會為網易帶來失而復得嘅重要收入,今季網易收入應該會升返唔少啦,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票