22/03/2024 16:45
《小傳日記》天下武功無堅不摧,唯快不破?理想MEGA快推炒車
《小傳日記》「星爺」啲戲好多人都睇過,啲逃學乜乜、家有乜乜呀,可以話已經變成賀年劇,好多鐵粉連對白都背到滾瓜爛熟!不過,我只係對《功夫》裏面嘅一句對白有感,就是「天下武功無堅不摧,唯快不破」。意思係冇一門武功係最好打嘅,只有「快」係冇人可以對付! 點解會無啦啦扯到咁遠?皆因睇到段新聞,話理想汽車(02015)創辦人李想認錯,話佢部旗艦車「理想MEGA」同銷售主力L系列同步發布,結果搞到廣告同銷售前線無法兼顧,顧此失彼之下影響咗「MEGA」嘅銷售,「理想MEGA」開售後據報訂單表現唔理想。從呢個角度睇,「快」唔係真係贏晒。前車之鑑,舊年百度(09888)擒擒青推個「文心一言」,結果質素真係問心一言難盡,弱點就盡現! 李想自己都話,「理想MEGA」同高壓純電一樣,都必須經歷一個「理想ONE」同增程電動相似嘅由0到1嘅階段,無法像理想L系列一上市就可以擁有由1到10嘅經營勢頭,係佢地對純電戰略節奏嘅誤判! 理想股價喺2月底高見182﹒9銀後急跌,當然亦同大雙頂嘅技術形態有關。今日再跌超過近11%,仲穿過120銀,收報120﹒4銀,即係唔夠一個月時間,股價跌咗超過三成四,都咪話唔誇張!我估理想股價仲要調整,最理想可以守住100銀,失守就要睇80銀支持力有幾強喇! 既然講開車,比亞迪(01211)推出售價168萬人仔嘅電跑「仰望U9」,賣點係時速由0到100公里只需2﹒36秒,仲快過「林寶」!好老實,樣樣產品都有賣點,之所以叫「U9」,斷估係因為佢嘅極速係每小時309公里,即係「Upper limit」或「Up to」咁解啩,但係法拉利296 GTB極速係330公里,「林寶」嘅Aventador SV更加係350公里。 不過咁,話晒都係首部電動國產跑車,已經有「林寶」或法拉利嘅有錢佬,買多部亦唔爭在,就算炒咗亦唔志在,或者都有啲市場啩!不過,你估個個都係賽車手咩!超過100公里已經唔係人人可以駕馭,有幾何可以上到300公里吖,都係攞嚟威㗎啫!請請!(pc) *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票