《魚缸博客》最近聽到最開心嘅消息，就係美圖（０１３５７）終於清倉自己堆比特幣，而且賺成差唔多六億港紙，然後會將八成以特別股息派發，博客心裏不禁暗暗講句：「好囉，阿仔你終於醒啦，唔再發白日夢啦。」　　　博客唔係反對人炒Ｃｏｉｎ，如果你本身係搞區塊鏈、做加密貨幣平台，持有ＢＴＣ係好正常；但你本身係一個ＡＩ整圖、修圖軟件，又走去插足ＢＴＣ，公司嘅升跌就會變成同ＢＴＣ掛勾，其實係不利整體發展，咁開間公司上左市直接炒Ｃｏｉｎ都得啦，做食品做石油做地產一齊炒，咁本業仲做來幹甚麼？而家將佢清倉，又有錢賺，又可以回歸老本行，真係叫做雙贏。　　　大摩自己都指出，美圖因為持有加密貨幣，股價長期偏離其基本價值，長期價值投資者質疑美圖營運重心。出售所有加密貨幣用作股東回報及業務發展，標誌著公司管理顯著改善。　　　講返美圖先，其實佢又無放低老本行，相反係修圖上佢都係國內領先位置，加上而家個個都講ＡＩ修圖，手機都係要同呢類公司買技術，所以預計可見未來，係修圖技術上都需求好多，而美圖就可以係呢方面發揮到自己公司業務價值。　　　再加上，美圖係ＡＩ修圖上技術都好成熟，美圖秀秀可以體驗到ＡＩ寫真、ＡＩ消除、ＡＩ繪畫、ＡＩ擴圖等技術，呢堆護城河產品係美圖核心，但美圖如果想突破股價再向上，可能真係要發展橫誇行業軟件，例如文字、聲音、影片之類嘅產品。短線博客睇好美圖可以衝上３﹒６元呢個水位，建議而家可以入手。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】政府擬立法規定所有的士須於車內安裝攝錄設備，你是否認同？ ► 立即投票