《小傳日記》魚缸愈來愈乾塘，今日仲連７００億銀都差啲唔過，個個都話係等埋ＱＱ（００７００）放榜先部署，個個都咁高期望，萬一ＱＱ變「撻Ｑ」咪死？不過呢排「Ｑ」字行運，可能ＱＱ都會有好報，今日隻Ｑ　ＴＥＣＨ（０１４７８）就單日大升咗一成七。　　丘鈦中期成績表強勁，純利大增４﹒５４倍，淨賺１﹒１５億人仔，收益多四成去到超過７６億人仔，毛利４億人仔都翻咗一倍有多。噚日中午放榜，績後都無乜表現，但時隔一日多得大行加持唱好之後，今日就即刻大翻身，果然幾好成績都要有人大聲唱通街先得。　　丘鈦成績表就講到，呢半年攝像鏡頭銷售量多咗三成有多，其中用於智能汽車同物聯網嘅智能攝像鏡頭銷量更加大增一倍，令集團營業額實現快速增長，應該就係今次成績表之中比較重要嘅新引擎。丘鈦又回顧返上年度業績提到嘅２０２４年收入指引，今次中期無論喺整體鏡頭銷量、車載鏡頭以及手機鏡頭方面，全部目標都超額完成，係真正嘅表現好過預期，難怪都要賣花讚花香。　　雖然孖屐成日都將丘鈦歸類為蘋果概念股，不過實際上蘋果並唔係丘鈦嘅客戶，只係平時炒開設備股順手炒埋。據丘鈦今次中期績公布，期內最大客戶貢獻超過２２億人仔收入，佔期內總收入超過兩成八，同一客戶帶來嘅收入亦比上年同期大增超過四成半。據丘鈦旗下丘鈦微之前招股書透露，直到２０２２上半年公司第一同第二大客戶分別係ＯＰＰＯ同ｖｉｖｏ。　　ＯＰＰＯ今年今年初出完Ｆｉｎｄ　Ｘ７系列，年中再出Ｒｅｎｏ　１２系列，目前已經傳緊即將會喺１０月發布Ｆｉｎｄ　Ｘ８系列，咁樣嘅出機速度的確大有可能要加大鏡頭訂貨量，ＯＰＰＯ亦大有可能就係喺上半年貢獻丘鈦２２億人仔收入嘅最大客戶，如果ＯＰＰＯ繼續保持咁高速嘅出機速度，丘鈦下半年嘅成績都有保證啦，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇