《小傳日記》１０月內地復工之後，兩地股市似足ｈｏｌｉｄａｙ　ｍｏｏｄ嘅打工仔一樣，無晒動能。之前人行發布會夠晒大力，但係跟住落嚟嘅三場重磅記者會，只可以話希望愈大失望愈大，港股計埋今日已經四連跌，仲要曾經跌穿２萬添，真係唔知幾多好友遭殃。　　今日住建部記者會被寄予厚望，因為今次「央媽政爸」都有份參會，孖屐諗住終於有嘢睇，結果再次失望而回。內房昔日大佬融創（０１９１８）都打算好消息期間宣布配股可以跌少啲，點知偷雞唔到蝕拃米，跌曬噚升幅兼嘔凸；今日連本地地產股都要倒跌，本地「地產新晉」李寧（０２３３１）都跟跌咗２％。　　李寧身為國潮大牌，上年底諗著摸底入市使２２億銀同恒地（０００１２）買起北角港匯東全帷，部分樓層作為總部，係咁易都算成為咗包租公，染指本地地產市場。　　賣鞋似乎已經滿足唔到李寧嘅資本雄心，時隔未夠一年就再有動作，由李寧本人控股嘅非凡領越（００９３３），噚晚就宣布要私有化所持Ｂｏｓｓｉｎｉ（００５９２），不過就係用發行新股再換股方式私有化，每１股非凡領越新股，換５股Ｂｏｓｓｉｎｉ，每手Ｂｏｓｓｉｎｉ可以換到４００股非凡領越。但以兩隻股停牌前股價計，１股非凡領越係比５股Ｂｏｓｓｉｎｉ平咗大約１２％，蝕讓之餘仲要無現錢收，結果今日Ｂｏｓｓｉｎｉ就大跌１６％收場，而非凡領越就因為跌市最終都要跌差唔多２％。　　Ｂｏｓｓｉｎｉ係由本地羅定邦家族創立，徹頭徹尾嘅華資時裝品牌，到２０２０年先被當時未轉主板上市嘅非凡中國入主。非凡領越用新股方式私有化Ｂｏｓｓｉｎｉ，打算兵不血刃就將Ｂｏｓｓｉｎｉ袋袋平安，慳皮程度同上年大拿拿２２億入市買樓嘅李寧真係完全唔似係同一個人。其實當年李寧買起Ｂｏｓｓｉｎｉ已經唔係用市價買入，而係以折讓七成嘅賤價（４６６２萬銀）入主。當年好多人都睇好李寧筍價買起Ｂｏｓｓｉｎｉ可以大展拳腳，但事到如今本地服裝牌子都仍然雞肋，甚至乎而家股價仲要比當時再低，好在李寧係用賤價買，如果唔係而家都要損手，所以就拿拿聲用咁嘅方法私有化，當無眼屎乾淨盲。　　非凡領越對於持貨呢幾年都無肉食明顯呻笨，直言Ｂｏｓｓｉｎｉ長期乾塘，急須ｃａｐ水，但由於根本股價炒唔起，再融資無門，唯有退市嚟節省開支。都講得好白架喇，以為平買有著數，勢估唔到Ｂｏｓｓｉｎｉ竟然唔爭氣到咁樣，難怪李寧連１蚊都唔想再使喺呢隻Ｂｏｓｓｉｎｉ身上。結果就係李寧大花筒紀錄又添一筆，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇