《魚缸博客》市場等待今晚聯儲局議息結果，維持利率不變已經完全消化，大家都係等緊鮑公開口，暗示９月份減息。　　恒指近日喺１７０００點彈上彈落，似穿又收番上去，但不經不覺，恒指其實已經失守曬所有主要移動平均線，當然包括２５０天線啦。恒指自５月份高見１９７０６之後就反覆陰跌，之前萬七點附近嘅重牛區已被攻陷，但所謂牛死牛還在，依家重牛區落到１６７００至１６８９９，而且好友似喺１６８００至１６９９９再次累積牛證，依家市底都係弱，我估淡友打算等齊好友上車，先至一次過殺落去！　　巴黎奧運比賽接近一周，香港隊劍氣逼人，所向披靡！江妟憓女子個人重劍奪金，張家朗更加喺男子個人花劍成功衛冕！中國國家隊不嬲都係奪金常客，就唔使多講喇！既然提到體育盛事就知博客想借題發揮講體品股啦！今日幾隻體品股表現一般，升幅介乎１﹒５至２﹒５％。　　安踏體育（０２０２０）升１﹒５％，報６８﹒７元，最高見６９﹒５５元；申洲國際（０２３１３）升２﹒３％，報６４﹒６５銀，最高見６５﹒２銀；李寧（０２３３１）升２﹒４％，報１４﹒４２銀，最高見１４﹒５４銀；特步國際（０１３６８）升２﹒９％，報４﹒６７銀，最高見４﹒７４銀。　　以走勢計，李寧尋日跌到１３﹒９６銀，創近４年低，表現最差，但亦不妨博短線反彈，穿１３﹒９６銀止蝕，目標１６﹒５銀；特步相對較穩，而且舊年股東應佔溢利增長１１﹒８％，至逾１０﹒３億人仔，技術上６銀阻力大，跌穿４﹒４７銀止蝕可也；申洲個大型橫行形態更加明顯，依家處於橫行底更加值博，現價６４﹒６５銀入得，可以望上８５銀，跌穿６０銀止蝕。　　不過，安踏舊年溢利增長３４﹒９％，至１０２﹒３６億人仔，技術上，股價日線圖走勢同９ＲＳＩ輕微底背馳，預期周息率３﹒７８厘，同申洲差唔多，穩陣之選，現價６９﹒１５銀可入，上望７６﹒７銀，跌穿６７銀止蝕。（ｐｃ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【etnet 30周年】多重慶祝活動一浪接一浪，好禮連環賞！ ► 即睇詳情