08/05/2024 12:08
《魚缸博客》火電有剛性需求,低吼電力股可揀華能國電!
《魚缸博客》魚缸連升十日後終於見回吐,但其實整體氣氛仍然偏好,好多板塊都仲keep到鑊氣,乜都升反而有啲難入手嘅感覺。撇除返集中熱炒嘅內銀內險同AI,其實電力板塊都算係視線以外嘅潛在首選。 近期國家主席習近平國事訪問歐洲,孖屐睇好有望傾談有關環保概念,尤其紓緩有關對中資新能源企業嘅制裁,所以早兩日光伏股都炒過一浸。碳中和係大勢所趨,但科技需時發展,傳統代化石燃料發電仲係有無可取替嘅剛性需求存在,比起綠電,火電依然係國內「快靚正」之選。 時間嚟到5月,天氣轉熱,換句話講又到用電高峰,趁而家未到最熱,電力股仲未成為炒作主流,現價都不失為值得留意嘅時候。縱觀電力股普遍都有國企背景,而且低PE高息率,正正就係中特估概念嘅重要一板。 電力股之中,華能國電(00902)係電力龍頭之一,燃煤發電佔比為88%,當火電需求上升將會對股份較為有利。以走勢而言,華能國電上月上試5﹒43銀高位後回落,4月中至今都喺4﹒8銀附近橫行,係唔錯買入水平,以4月高位5﹒43銀為初步目標,夏季用電量上升有望乘市況良好向上挑戰6銀水平。 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】巴黎奧運正式閉幕,今屆你感到最深刻的地方是?► 立即投票