《魚缸博客》各位師兄，如果有留意開博客講大市，都知道博客一路都係淡友，好多股份表現好似好好，但實際又有暗湧。　　　先講下騰訊（００７００），按年純利大升六成八表現勝預期，好多大行都升目標價又唱好，不過博客覺得都係大行「俾面評價」，只要你細拆入面業務就知道咩事：增值服務業務收入按年增長７％至３１９２億元，當中國際市場遊戲收入５８０億元，增幅９％；本土市場遊戲收入增長１０％至１３９７億元；社交網絡收入增長２％至１２１５億元。　　　遊戲行業一直都係一個「先窮後富」嘅行業，即係花幾億製造遊戲，或者幾十幾百億去買間遊戲公司兼買埋個ＩＰ，然後獲取千幾億暴利嘅玩法。你細睇騰訊遊戲業務增長，９％？１０％？呢啲數字意味住騰訊一路食胡嘅遊戲業務已經去到樽頸位，又或者直接講，現有遊戲走到壽命盡頭，接近渣乾剩餘價值，未搵到新一代現金牛。　　　難聽講句，騰訊呢幾年股價點解咁硬淨，都係一般大公司玩法：回購。去年回購千幾億股分，今年講明回購８００億，規模係細小小，但對股價有支持作用。博客覺得大行點解俾出６００幾蚊目標價，某程度同業績無咩關係，純粹係覺得回購呢下可以支持股價上到６００蚊咁解。　　　不過，係騰訊是否升得上６００蚊之前，博客預示，股價可能先要回吐調整，你睇恒指連續幾日都上唔到２５０００點就知，自己睇路啦。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇