16/05/2024 11:51
《魚缸博客》阿里業績未如預期,惟現技術突破宜候調整買入
《魚缸博客》尋晚美國勞工部公布,4月份整體CPI按年升3﹒4%,升幅比3月份輕微低咗0﹒1個百分點,核心CPI按年升幅就下降咗0﹒2個百分點至3﹒6%。就係咁,市場又再炒作聯儲局好快會減息,美股三大指受數據刺激,再創收市新高。道指升約350或0﹒9%,收報39908點;標指升逾61點或1﹒2%,收報5308﹒15點。納指漲逾231點或1﹒4%,收報16742﹒39點。 港股呢邊,憧憬息差收窄,加埋之前內地公布咗連串拯救房地產同推動經濟等措施,恒指高開近190點或0﹒9%,報19262點,整固後進一步攀升,最高升至19397點。技術上,恒指累積升幅已經超過舊年1月以嚟最大跌浪嘅五成反彈幅度,再向上就會挑戰61﹒8%的反彈目標約19680,估計呢個水平阻力唔輕,暫時預計會出現調整,而17200至17000應該係強力支持,到價先再重新睇上。 重磅科技股騰訊(00700)同阿里(09988)都公布咗業績。阿里截至今年3月31日止年度,純利797﹒41億元人民幣,按年升近10%,每股盈利3﹒91銀人幣;非公認會計準則淨利潤1574﹒79億銀人幣,按年升11﹒4%;收入亦增長8﹒3%,至9411﹒68億銀人幣。騰訊今年首季股東應佔盈利418﹒89億銀人幣,按年增長約62%;每股基本盈利4﹒479銀人幣。以非國際財務報告準則計,股東應佔盈利502﹒65億銀人幣,按年增54%,遠勝市場預期。 兩者表現以騰訊超越阿里,但技術走勢上,騰訊已經處於嚴重超買水平,阿里只係啱啱破位,可以攤凍嚟食,而且預計恒指短期再升空間有限,隨時會出現調整,所以唔建議高追騰訊。至於阿里就可以攤凍嚟食,等佢喺250天線收上整固一段時間,最好期間恒指都出現1000點以上嘅調整,先好買阿里。技術上,阿里應該已經重新企穩75銀,如果跌穿條250天線,可以吼75至76銀買入,跌穿70銀收市就止蝕,目標暫時上望123﹒8銀。 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】本港無人駕駛自動車最快本月底試運,你會否乘坐?► 立即投票