《魚缸博客》內地第三季ＧＤＰ按年增４﹒６％，算係符合預期至好過預期之間，撐得住恒指半日升市。而三頭馬車方面就驚喜多少少，尤其係９月社會消費品零售總額按年增３﹒２％，年增幅多過８月嘅２﹒１％之外，亦好過預期嘅２﹒５％，所以今朝早整體內需股表現都精神少少。　　消費品零售之中，９月通訊器材類零售總額按年增１２﹒３％，即係多咗人換手機啦。另外早幾日調查機構Ｃａｎａｌｙｓ報告都顯示，今年第三季全球智能手機出貨量按年增長５％，係連升第四個季度。其中，三星出貨量佔全球１８％，輕微贏過蘋果成為市佔冧巴溫，蘋果同樣大約１８％就緊隨其後。　　身為大佬嘅蘋果又點會甘心被個阿二爬頭？所以近期明顯係加快咗新產品推出進程，唔再以一年一度嘅發布會為首，反而年中出多幾次新產品，滿足廣大果粉期望。既然加快咗產品周期，咁一眾蘋概股就可以多啲料炒啦。　　今朝啲手機設備股普遍都幾硬淨，始終三頭馬車省鏡都撐一撐魚缸表現。今朝尤其是隻比亞迪電子（００２８５），一朝早就升咗差唔多兩銀，接近６％升幅成為半日最佳表現藍籌。走勢上睇，比電下方３１﹒５銀至３１﹒７銀支持超強，１０月８號港股大回吐跌穿位之後兩日就修復得返，之後幾日至今都明顯有強勁支持，不妨就喺３１﹒５至３１﹒７銀部署返，呢個位亦係目前牛熊線所在，短線挑戰４１銀應該唔難。　《編者按》本欄搜羅即市傳聞，惟消息未經證實，《經濟通》亦不保證內容之準確性。　

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇