18/01/2024 16:28
《開市Good Morning》溫鋼城明講神州經濟及投資日股
《開市Good Morning》香江魚缸呢大潭死水今日又似有返啲起色,全日走勢反覆,高低波幅得200幾點,好彩收時都升到114點,收報15391點,成交算係有返啲睇頭、上返千億銀。睇埋魚缸9天RSI已落至約20超賣區,希望真係吐氣揚眉維持到反彈勢頭啦!不過魚缸除咗平,又真係搵唔到咩好優點,AH股走勢同弱下,預計邊個孖屐會率先搵到支持? 神州現處於比上不足、比下有餘嘅「中等收入」兩難,又可以點樣先跨越到「中等收入陷阱」?神州人口老化問題日趨嚴重,「中等收入陷阱」問題恐進一步惡化?青年就業情況唔理想加消費降級,過去年青人相關嘅消費題材,如泡泡瑪特(09992)、奈雪的茶(02150)、海倫司(09869)等股難再有二次投資機會? 日股周一(15日)盤中曾見36000點樓上,即使呢兩日稍回調都仲係處於高位,點解日股一啲都唔悲觀、仲睇到花旗國減息嘅好處?喺魚缸上市嘅ETF,會唔會因為溢價過高而被叫停牌?不過日股貨幣政策仍有不確定性,同時係前孖屐博弈焦點,投資日股仲有咩風險因素要留意? 聽日(19日)《開市Good Morning》搵嚟iFAST Global Markets副總裁溫鋼城,同大家分析上述股份、大市走勢,當然唔少得分析其他焦點股份!歡迎大家提問投資及其他股票問題。記得準時8:55am,昅實《經濟通》NewsTV直播節目--《開市Good Morning》喇!或者click入嚟https:╱╱www﹒youtube﹒com╱watch?v=t17MdVx5xEU 打個卡先又得!
【你點睇】國家隊奧運健兒訪港,有市民指難以購票感到遺憾► 立即投票