《魚缸博客》５月１日，梅龍高速公路梅大段發生路面塌陷事故，至今造成４８人死亡，多人受傷。關於今次事故嘅原因，眾說紛紜。有人質疑係豆腐渣工程，亦有人推測可能與地質結構，雨水侵蝕同埋施工質量有關。有工程師向內媒「界面新聞」透露，從現場照片睇，事故路段處於山體邊坡位置，道路下方路基是採用填方嘅方式處理，相鄰段做了簡單的護坡，但睇唔到重力式擋土牆、土釘、錨桿、抗滑樁之類嘅擋土同支護結構。亦有工程師話，監測同預警方面都有不足。關於事故原因，呢度就唔猜測啦。　　呢段新聞，有媒體報道梅龍高速，亦有報道梅大高速，同事搞到一頭霧水，問究竟係邊個先啱？嚴格來講，兩個都啱。因為梅大高速是梅龍高速嘅其中一段，更嚴格來講，係梅龍高速梅大段先啱。梅龍高速北起福建龍岩市，南至廣東梅州市，因此，被稱為梅龍高速。而梅大，就是大埔縣至梅州呢一段。　　博客自問對內地情況尚算了解，當聽到梅龍高速時，即刻打咗個凸，點解唔係龍梅高速？按照國家高速公路命名規則，高速公路嘅命名順序係由東到西，由北到南。東西向嘅例子如滬蓉高速（上海至成都），北南向嘅例子如京滬高速（北京至上海）。但龍岩在梅州嘅東北方，無論以東西向準則命名，定係以北南向準則命名，都應該叫龍梅高速先啱，點解會叫梅龍高速？相信只有關當局先知。不過，據講梅大路段２０２３年都發生過塌方，好彩當時無人傷亡。估唔到時隔一年，竟然發生咁大事故，希望有關當局除咗重新檢查呢個路段嘅安全性之外，亦考慮下重新命名，以正視聽。　　講起高速公路，其實股市中不乏高速公路相關股，有啲營收穩定，低市盈率，又有高息率派，例如江蘇寧滬高速（００１７７）、安徽皖通高速（００９９５）、浙江滬杭甬（００５７６）等，買來當存錢都唔錯。　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇