25/01/2024 16:55
《小傳日記》東方甄選中期賺少一成半!衰在未有新花款?
《小傳日記》人行宣布降準後第二日,中特估繼續狂飆,中海油(00883)破頂兼中石油A八年來首次漲停,熱錢忽然湧入,沉寂一時嘅中特估再次落鑊,終於印證之前阿爺推中特估嗰陣嘅口吻,真係「有升有息」。 阿爺放水,孖屐都係吼國企為主嘅中特估,好大原因都係中特估有息收,比起無派或者少派息嘅科技股,孖屐都變得比較「好息」。相反,科技股、車股之股之類無乜息派嘅增長股就被孖屐掉埋一邊。噚晚新東方(09901)同東方甄選(01797)出中期業績,結果新東方成績好過預期,但係威係勢嘅東方甄選反而賺少咗。 東方甄選截至23年12月底中期純利2﹒5億人仔,按年賺少五成七,經調整純利就係5億人仔,按年賺少一成半,但其實營收按年升咗三成四到28億人仔。全年新聞多多,話到去到邊度開地方專場,又有幾錢GMV,結果中期收錢多、賺錢少,變咗大隻廣。東方甄選方面就解釋,係因為業務大幅增長,令到自營產品的存貨成本及運輸成本增加。 呢半年來仲未發生「小作文」事件,董宇輝仲係直系東方甄選嘅主播,有董宇輝都仲搞成咁,都說明東方甄選面對緊嘅問題並唔單係董宇輝嘅去留問題。東方甄選都坦言存貨同運輸成本增加係毛利受壓嘅主因,因應目前東方甄選已經過咗開頭嘅增長期,今次毛利受挫就證明消費者嘅受落程度並未及得上公司擴張速度,存貨都開始上升,目前必要就係提升客戶群人數。 而家嘅東方甄選已經係邁向緊對標拼多多,除咗董宇輝,東方甄選暫時都未見到另一個可以令佢由眾電商突圍嘅要點,要令東方甄選再提升一個層次,製造好下一個賣點非常重要,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】本港無人駕駛自動車最快本月底試運,你會否乘坐?► 立即投票