18/03/2024 11:53
《魚缸博客》TikTok成焦點,微博純利飆反遭降目標價有原因
《魚缸博客》近年因為疫情關係,正常社交生活受到嚴重影響,反而造就咗社交平台崛起,TikTok就係當中的佼佼者。短短幾年在歐美以至世界各地掀起一股熱潮。TikTok嘅中文版抖音早已風行內地,筆者雖然無玩,但睇得多一啲都唔陌生。而國際版嘅TikTok,或者因為匯集了世界各地唔同面孔、文化,所以出來嘅效果更具娛樂性,畀內地版嘅抖音更有睇頭。可以咁成功,相信連TikTo嘅大老闆都始料不及。 然而,正因為佢嘅成功,迅即引來打壓嘅聲音。有關禁用或限制TikTok嘅聲音近年不絕於耳。近日,美國白宮重申,支持眾議院要求中國字節跳動剝離影音分享平台TikTok業務嘅法案,但唔希望見到TikTok被禁制,而係要求TikTok脫離中國母公司,以釋除數據安全疑慮,避免美國用戶嘅數據落入中方手中,危害美國國家安全云云。 眾議院上周壓倒性通過法案,要求字節跳動喺法案生效165日內剝離TikTok業務,否則TikTok將會被禁制。總統拜登早前已經表明,若國會通過法案,他就會簽署生效。不過,參議院暫時未安排快速處理,部分議員表示,期望有更多時間審視法案。 TikTok嘅結局如何暫時唔知道,若因此被限制或禁用,相信得益嘅係美國其他社交平台,對內地嘅社交平台應該唔會有乜嘢好處。微博(09898)係內地領先嘅社交平台之一,除咗老對手微信之外,近年出現嘅競爭對手也唔少,包括抖音,小紅書等都來勢洶洶。 微博上周四(14日)收市後公布業績,2023年全年純利升三倍。但股價喺之後嘅交易日反高潮,倒跌收市。對於小散戶或者有啲意外。但如果睇返過去幾年集團嘅盈利,相信對於股價嘅反高潮應該唔會意外。其實,2023年純利之所以大升3倍,同2022年嘅超低基數有關,該年度純利比2021年大跌8成。咁低嘅基數下升3倍,難怪市場唔收貨! 如果用2023年嘅純利同2019年比較,都勉強只得後者嘅7成。即係話微博呢4年不但無進步,仲倒退左3成。難怪績後被多家大行削目標價,當中中銀國際大削4成目標價。所以,唔好因為舊年純利升3倍,就博曬命,表面好睇嘅嘢,有時金玉其外。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情