《魚缸博客》大市近日係萬九點略有壓力，而且好多人壓注大市回調，連反向ＥＴＦ都大量資金流入，想ＫＥＥＰ住啲錢又想好過收息？可以試下玩私有化股份？　　例如華發物業服務（００９８２）公布，根據由鏵金投資以協議安排方式將華發物業服務集團有限公司私有化之建議，私有化要約價每股０﹒２９元，較公司於停牌前、５月１５日收市價０﹒２２２元，溢價約３０﹒６３％。於該計劃生效及該建議完成後，要約人及光杰（即要約人的直接控股公司）將分別擁有公司約９６﹒２％及３﹒８％的股份。　　博客撰文時，股價都仲係０﹒２６元，離私有化價格仲有０﹒０３元價差，以兩萬一手計，每手都有６００蚊賺下，買返十幾手其實都幾好玩！　　不過，私有化都有可能失敗，如果股東唔夠票咁就做唔到。但通常私有化失敗嘅股份都係啲爭議性比較大、或者隻股份本身比較出名。好似華發物業呢類無咩人講嘅股份，要失敗機會不大，但都仍有機會。　　留意返，如果真係想玩呢條水，要留意自己Ｃａｓｈ　ｆｌｏｗ夠唔夠，特別係如果借錢玩，因為私有化都需要一定時間去完成，要計好數啦！　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票