25/04/2023 11:49
《魚缸博客》智利計劃國有化鋰礦,贛鋒44銀以下可吸納?
《魚缸博客》魚缸噚日兩萬點都守唔住,今朝繼續跌,醫藥股同鋰礦股係重災區。淨係喺A場,鋰礦概念股跌近半成,新冠藥、創新藥、鈉電池、鋰電池等概念股一齊捱沽,拖累創業板指數跌2﹒08%,五日以嚟累計跌幅達7﹒3%。 鋰礦股大跌,可能同智利政府計劃國有化鋰礦有關。智利總統博里奇宣布,智利政府計劃將採用國家與私人部門合資嘅方式,促進當地鋰產業發展。佢話,政府會成立一間國家鋰業公司,所有參與智利鋰業,無論當地或外國私營企業,都一定要同國家鋰業公司合作,智利政府會喺合資企業中持有控股權。 博里奇重申,智利政府唔會終止依家嘅合同,希望鋰礦商喺合同到期前,對國家參與持開放態度。即使佢無點名智利鋰礦雙巨頭智利礦業化工集團同美國雅保集團,兩間鋰礦企業可以自願交出對公司資產嘅控制權。 事件之所以咁大鑊,係因為智利擁有全球最大嘅鋰儲藏量之一,亦係第二大鋰生產國,僅次於澳洲。智利今次有意將鋰礦國有化,可能會刺激未來對鋰嘅投資轉向其他國家,最終可能會影響到智利全球鋰礦供應大國嘅地位。 天齊(09696)今日喺H場曾經跌到上市新低,贛鋒(01772)亦曾經跌超過7%。睇番贛鋒嘅日線圖,由上星期三(19日)開始都突破唔到50天線,今朝大陰燭插穿10同20天線,好大機會下試今年低位43﹒95銀。想趁低吸納嘅朋友,當然可以吼住44銀樓下買入喇,但依家「孖屐」要多啲時間消化不利消息,謹記嚴守止蝕,40銀都失守就離場喇! 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】國家隊奧運健兒訪港,有市民指難以購票感到遺憾► 立即投票