03/03/2023 11:43
《魚缸博客》嗶哩嗶哩第四季虧損收窄,前景不宜太樂觀!
《魚缸博客》嗶哩嗶哩(09626)放榜喇,舊年全年虧損擴大到74﹒97億人仔,2021年同期虧損67﹒89億人仔。經調整淨虧損亦擴大到66﹒92億人仔,2021年同期經調整淨虧損54﹒78億人仔。 不過,單講第四季公司嘅虧損少咗,由2021年同期嘅20﹒88億人仔收窄到舊年嘅14﹒95億人仔,經調整淨虧損收窄到13﹒12億人仔,上年同期為16﹒52億人仔。至於第四季同全年嘅淨營業額總額分別按年上升12﹒98%同6﹒3%,增長唔算好明顯。 另外,嗶哩嗶哩第四季日均活躍用戶增加29%到9280萬,用戶日均使用時間長達96分鐘,推動用戶在B站的總使用時長同比增長51%。月均活躍用戶增加20%到3﹒26億,平均每月付費用戶就增加15%到2810萬。董事長兼首席執行官陳睿指,公司將重心切換到以日活用戶增長為目標後,第四季度日活用戶穩健增長,毛利率提升同虧損收窄。 嗶哩嗶哩期望2023年全年淨營業額達到240億至260億人仔,不過公司仍然未扭虧為盈,舊年12月全國短視頻用戶人數突破10億,用戶使用率去到近95%,本地用戶未必再有好高增長,想向海外擴展業務亦唔容易。即使兩會之後可能有啲政策扶持科網企業,但嗶哩嗶哩前景唔可以睇得太好。 今日嗶哩嗶哩股價高開超過一成,朝早走勢平穩,暫時喺10天線附近爭持緊。短線嚟講,始終有兩會政策憧憬,可能仲會炒多陣,嗶哩嗶哩估計可以彈上去20天線附近,但未必可以突破50天線,未有貨嘅朋友可以等股價落番100天線附近吸納,目標173銀,失守140銀止蝕。 《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票