29/04/2024 16:51
《小傳日記》比特幣現貨ETF上架!可以提高到市場流動性喇卦?
《小傳日記》登登登凳!魚缸終於會喺聽日迎來第一批虛擬貨幣現貨ETF,係亞洲區第一個市場提供虛擬貨幣現貨ETF,美國今年初先啱啱批准現貨ETF上市,魚缸時隔三個月多啲就批到現貨ETF上市,終於比起其他市場進步,希望真係可以圓到港府提高市場流動性嘅心願啦。 六隻虛幣現貨ETF將會由三間基金公司發行,分別係華夏基金(香港)、嘉實國際、博時國際發行,各自會發行一隻比特幣同以太幣嘅現貨ETF,分別係華夏比特幣(03042)、華夏以太幣(03046)、嘉實比特幣(03439)、嘉實以太幣(03179)、博時比特幣(03008)同博時以太幣(03009)。 唔同於一般ETF,六隻虛幣現貨ETF將會100%直接投資比特幣或者以太幣,買入虛幣現貨ETF可以話係直接買咗虛幣,無電子錢包嘅投資者終於可以一嘗炒幣嘅刺激感。不過買得ETF就要畀管理費,以全年開支比率計華夏要1﹒99%,嘉實要1%,相對博時就抵少少,只係0﹒85%。 雖然係亞洲區第一個提供虛幣現貨ETF嘅市場,但係有意見就覺得,香港對於虛擬資產態度比較保守,所以未必會好似美國推出嗰陣咁豬籠入水。但睇返JPEX案,截至今個月中,涉及案件嘅金額就有成16億銀,即係都有16億錢都願意入手虛擬資產,如果而家直頭買ETF咁方便,其實都唔難吸引到潛在想投資虛幣嘅錢出嚟。 但睇返而家比特幣走勢,近呢幾日都真係麻麻,3月至今個月中炒高見70000美金打上就回落,加上halving都過埋,要回吐實在係大有藉口。近期頸線位處於60000美金位置,加上條100天線已經上緊嚟,可以預計60000大關將會係關鍵爭持位,入唔入現貨ETF就要睇實喇,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票