《魚缸博客》今日見到隻中海油（００８８３）創高位，望到買賣盤，唔係中資券行就係北水買貨，真係無鬼死唔到人。　　基本面分析，過去一年反反覆覆都企係高位，受到中東局勢緊張，加上俄油幾乎被抵制咁款，全世界原油市場都企係高位，油股基本上都係受惠。　　不過睇到有個大行分析幾有趣，高盛發布研報稱，重申公司「買入」評級，目標價１４﹒９港元，因為認為該公司極具競爭力的項目組合，新項目的盈虧平衡油價在每桶２０至３５美元之間，完全有能力在油價上漲中受惠。該行預計２０２４年布倫特原油價區間為每桶７０至９０美元。　　另估計中海油２０２４年度股息率料約１０％，目前的股價是以每桶６５美元的油價計算。　　股息率有咁高，真係幾和味，如果買來長渣收息都幾唔錯，加上近期油價有升無跌，相對地防守性真係好強。話就話全世界都想２０３５年用電車，但其實而家電車出現問題都幾明顯：第一就係冬天去到零下溫度，電池性能大打折扣；第二就係好似中國呢種遷移人口咁多嘅城市，一到春節國慶出遊，班電車Ｌ就死晒係高速公路，成個節日都係高速公路度過，所以你話電車想要完全取代，應該十年內都無咩可能。　　睇返今日中海油股價，連續兩日都兩支大陽，如果可以衝破到１６蚊應該會倒跌，所以而家入一注，升過１６蚊再入，跌返落去再溝；假如直上雲霄，就睇表現得啦，唔好再追，如果選擇長渣可以考慮擺係到收息；如果短炒就留意業績公布日期，記得公布業績前走貨就得。　《編者按》本欄搜羅即市傳聞，惟消息未經證實，《經濟通》亦不保證內容之準確性。

etnet健康網購 | 6月限定優惠【送：明目藍莓精華36:1】乙樽► 火速行動