29/01/2024 12:00
《魚缸博客》恒大清盤民營內房股高危,國進民退華潤置地得益
《魚缸博客》今日魚缸本來一片歌舞昇平,內房板塊也錄得唔錯嘅升幅。點知突然殺出一單恒大清盤嘅消息,好似一盤冷水照頭淋,一眾內房股應聲向下,升幅收窄。中國恒大(03333)開市不久便急瀉兩成,雖然中段有所反彈,但無幾耐又再次掉頭向下,之後更停牌。同系恒大汽車(00708)亦停牌。消息指香港高等法庭終於在今日作出裁決,對呢家全球負債最重嘅房地產企業下達強制清盤令。對於恒大停牌,甚至清盤的消息,其實不應該感到詫異,呢個係早晚要面對嘅問題。 對於內房這個板塊,市場呢幾年都聞之色變,好多散戶都避之則吉。當然,市場總有啲人心口寫住個「勇」字,抱著「當別人恐懼時我貪婪」的心態,趁股價低迷時小注入場,對於呢種想法,筆者不予置評,畢竟風險太大。 有啲人話住房有剛需,而衣食住行點都唔少得,所以就算內地人口增長放緩,甚至減少,但城市化還在進行中,有排都未飽和。所以,房地產依然有憧憬。若從這種思維看也無可厚非,但都要揀隻比較穩健的內房股嚟買,夜晚先瞓得安樂。當中,華潤置地(01109)相對比較穩健。在過去四年,當民營房地產公司面臨風雨飄搖嘅時候,華潤置地業績大致上力保不失。截至2023年6月止半年度的股東應佔溢利仲增加29﹒6%至137億元人民幣。不過,股價上周升幅不少,可以等回調至22元買入,目標價28元,20元止損。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
夏日中暑高風險!即睇中暑迷思+預防措施!► 立即了解