《魚缸博客》２０２３年好快咁就過咗，２０２４年首日，唔少同胞嚟香港倒數完，歸家路上唔多暢順，包括喺太子往皇崗口岸嘅通宵巴士「壞腦」，出唔到飛，以致站頭大排長龍，有乘客聲稱，一等就數小時，唔少人喺太子站內「露宿」，部分人諗住搭港鐵到上水再轉巴士往皇崗口岸，情況唔好得去邊，唔少人喺上水站內露宿，等頭班港鐵去羅湖及落馬洲。　　即使成功去咗皇崗口岸，亦唔係一片坦途，從新聞片段所見，唔少人出咗香港關之後，等唔到巴士往內地口岸，要徒步前往內地口岸，睇見都覺得慘。在此奉勸政府，喺呢啲大時大節，係咪應該將羅湖及落馬洲口岸嘅服務時間延長至凌晨３點或４點，方便啲同胞倒數完，順暢咁歸家；另一個想講下嘅就係，香港目前陸路口岸只有皇崗同港珠澳大橋係２４小時通關，嚟香港倒數嘅同胞係咪要有心理準備，幾十萬人塞爆呢兩個口岸過關，有冇可能順暢？嚟得香港倒數，係咪應該Ｂｏｏｋ間賓館或者酒店房？咪唔使咁辛苦囉！　　講番正題，本地魚缸今日（２日）高開低走，執筆時恒指曾跌近３００點，博客今日想講下隻恒大汽車（００７０８）。恒大汽車公布，紐頓集團股份認購協議及債轉股認購協議的訂約方並未同意延長截止日期，故有關協議已於２０２３年１２月３１日失效。恒大汽車指，紐頓集團股份認購協議及債轉股認購協議的訂約方，以及若干利益相關方一直就修訂擬議交易及債轉股若干關鍵條款進行磋商。　　既然債轉股認購協議失效，即代表紐頓集團未必會入股恒大汽車。恒大汽車股價一度急挫１８﹒６％，低見０﹒４１５元，即使跌咗唔少，本欄仍然建議暫時觀望。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票