15/11/2022 11:38
《魚缸博客》傳馬交競投賭牌有共識,濠賭股可以點部署?
《魚缸博客》魚缸暫時保持升勢,今朝ATM三隻重磅科技股曾經升超過5%,餐飲股好似海底撈(06862)、九毛九(09922)等等亦升得唔錯。 濠賭股都升埋一份,有馬交媒體報道,政府已經同競投新一個10年澳門博彩特許經營權嘅公司達成共識,喺特許經營期內嘅投資總額約1000億。報道指,兩邊上星期五開會,並且就預期投資額達成共識,其中,銀娛(00027)、金沙(01928)各投資超過200億,其他公司會投資近150億,總投資額將略高過1000億。 呢單消息一公布,金沙一度抽升超過7%。睇番金沙嘅日線圖,股價喺10月31日低位12﹒5銀開始反彈,keep住企穩喺10天線上,前日開始更加突破250天線,保持強勢,短線估計可以挑戰10月7日高位22銀。銀娛走勢同金沙差唔多,都喺前日開始突破250天線,目標可以留意10月7日高位49﹒75銀。 其他賭股方面,澳博(00880)由10月25日開展升浪,股價由當日低位2﹒31銀升到依家,累積咗超過三成升幅。今朝曾經升超過9%,並且突破250天線,但股價升破咗嚴重超買區,短期唔排除會出現回調,有貨嘅朋友建議食一食胡先喇! 《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情