《魚缸博客》魚時隔個幾月再挑戰１７０００，但今個月似乎都未夠力水突破，睇怕今個月仲係要再等機會。市難炒，好在板塊都識輪流炒，睇到啱心水嘅不妨炒股唔炒市，博客今日就睇中海底撈（０６８６２）。　　海底撈早年話要控制質素，一路堅持直營策略，但係上層市場飽和，特許加盟成為大勢所趨，所以海底撈終於都喺３月宣布開放加盟，如今應該已經開始陸續有加盟店出現。餐飲業加盟策略最成功嘅表表者可以話係蜜雪冰城，過萬間分店超過九成九都係加盟店，主要因為蜜雪冰城位處茶飲行業嘅最低端市場，入場成本低，自然吸引到想創業嘅小型資本，而蜜雪冰城都成為「我不賣茶，我賣品牌」嘅獨角獸。　　但海底撈嘅加盟模式明顯同蜜雪唔同，入場費最少１０００萬人仔，係開放加盟嘅神州餐飲公司入面數一數二，明顯係貴精不貴多，海底撈只係願意畀「有啲錢」嘅生意人加盟，而「有啲錢」背後固然要「有啲腦」，係有生意頭腦先會有呢一筆錢。所以，海底撈即使開放加盟，「控制質素」嘅基因依然潛藏喺加盟條款之中，海底撈絕對唔會容許開放加盟之後服務質素降低。　　據講海底撈喺店長薪酬上仲有類似傳銷嘅被動收入分成機制。海底撈店長係可以選擇發展下線，於是乎每月可以收到自己舖頭０﹒４％利潤，徒弟舖頭嘅２﹒８％至３﹒１％利潤，甚至係徒孫舖頭嘅１﹒５％利潤。將傳銷體系帶入餐飲業，海底撈已經唔單止係一間火鍋舖。　　睇返個價，近期神州都炒緊零售回暖，一個月等一個月嘅經濟數據，海底撈身為零售龍頭固然受數據波動影響。海底撈股價由上年１１月起一直回落，到今年初低見１１﹒９４先觸底回升，３月中至今受制２５０天線，但形成圓底回升至２５０天線水平整固，令走勢上形成「杯柄形」，之後有望突破杯邊上破。目前１６銀水平值博率高，加上近期沽空比率唔算高，預計後市上破２５０天線機會大，中線上望２１銀，連續兩日收穿５０天線止蝕。　《編者按》本欄搜羅即市傳聞，惟消息未經證實，《經濟通》亦不保證內容之準確性。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇