21/02/2024 17:06
《小傳日記》海底撈賺多倍幾,多得科目三帶起?
《小傳日記》人行繼降準之後再出重招谷大市,噚日宣布五年期LPR大減25點子,創LPR史上最大單次減幅,雖然魚缸慢咗半拍,不過今日都叫升過500點,成交又上返千二億,都算係咁。 大升市下海底撈(06862)都同沐恩澤,出盈喜預上年賺唔少過44億人仔,按年賺多一倍七之餘,比起疫情前嘅2019年度更加賺多七成有多。賺多咁多,不過今朝一開就要跌,好在後尾魚缸升足500點先拉返,結果今日都升住收場。 魚缸有魚缸沽貨,但係海底撈成績表計落真係有交代,仲賺得多過疫情前。海底撈就話,賺多咗係因翻枱率提高以及營運效率改善,而且下半年係賺得多過上半年。只係一條盈喜,海底撈只係用一句「營運效率改善」,唔通真係「科目三」嘅功勞? 事實上「科目三」並唔係海底撈所創,但係海底撈嘅活用程度已經令佢堪比海底撈主題曲。「科目三」原本係廣西嘅網絡歌曲,係唱「廣西人必備三項技能」。不過隻歌係唱咩唔重要,最重要係個beat夠洗腦,而且隻舞嘅搖擺動作夠曬魔性,好容易就令人爭著拍片「蹭流量」。其中喺山東嘅一位海底撈店員都跟跳,仲喺舖頭入面表演,令到其他店員跟著跳,最初可能係好玩,但係食客睇完舞會畀多啲tips,就令到店員有更大誘因跳舞。 而海底撈都有好好把握個勢,有傳新入職員工如果識跳「科目三」係可以加人工,又有傳識跳「科目三」仲成為員工每月評分嘅一部分。雖然官方無講明,但識跳舞同唔識跳舞嘅員工都爭住練,好難話唔係有錢使得鬼推磨,海底撈好有可能都有喺背後幫手谷呢一波宣傳。 但其實科目三上年11月先開始喺海底撈興起,就算幫盡都係嗰一個幾月,所以海底撈賺多咗真係未關事。不過海底撈把握呢股熱潮之快都係應記一功嘅公關宣傳,如果唔係有公司方面推波助瀾,相信都未至於hit成咁,究竟「科目三」有幾幫到手,今年份中期業績就真係睇得到喇,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】巴黎奧運正式閉幕,今屆你感到最深刻的地方是?► 立即投票