17/01/2024 17:07
《小傳日記》四萬未見可能先見萬四!港股仲有無位企?
《小傳日記》魚缸一日慘過一日,今日成交終於過千億,係2024年以來第一次,不過可惜就係跌市,最多跌過600幾點,噚日穿16000,差啲今日就可以穿埋15000。 跌市之下乜都跌,原本中段都仲有隻海爾智家(06690)做全場唯一升嘅藍籌,結果尾市都要跌,最後今日全線82隻藍籌無一倖免統統跌,海爾智家跌1%多啲已經係最好表現,榜尾就有能醫不自醫嘅阿里健康(00241)要跌逾8%。 個市咁殘,就連大行都要縮沙。早兩日滙證發表研究報告,唱淡QQ(00700)前景。滙證就大彈QQ最煞食嘅遊戲業務有青黃不接現象,傳統大遊戲基數龐大已經好難有增長,新興party game又未咁快可以成為增長動力,將今年嘅內地遊戲增長預測由5%降到去3%。唔止咁,QQ另一個增長動力視頻號同樣被唱淡;滙證就話神州經濟唔掂,商家投放喺視頻號嘅廣告都會相對減少,所以要借經濟環境呢道東風嘅廣告業自然唔馨香,所以就將今年QQ嘅線上廣告增長預測降至11%。種種因素夾埋,於是就將目標價由415銀降到去380銀。 QQ最高曾經都係世界市值頭十名,不過自從監管風暴以來,QQ都好難再橫向發展,連原本手持嘅京東(09618)同美團(03690)股份都要派街坊,就係唔可以有太多額外嘅收入,唯有專注喺目前嘅四大業務上面。但大家都知科技股係講創新,騰訊成立咁多年,累積基數咁龐大,已經好難再有大增長,加上發展受限,兼夾經濟唔好,令到QQ連賣廣告都唔靈,打破曬孖屐嘅希望。 美團同巴巴(09988)都已經被睇淡,美團仲已經被調低恒指權重,QQ已經係魚缸最後希望,如果都表現唔得,魚缸真係萬四不遠矣,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇