29/01/2024 17:02
《小傳日記》今夕恒大歸故土,他朝內房點算好?
《小傳日記》世人常用「梅菲定律」去形容可以聯想到嘅壞事都必然會發生,而大家聯想得到嘅「恒大清盤」,到第七次嘅清盤聆訊,終於都要被勒令清盤。 今日之前孖屐已經有傳今日嘅恒大(03333)清盤聆訊同過往有啲唔同,因為今次清盤聆訊之外仲附帶一項潛在規管命令聆訊,有呢種規管命令聆訊通常都意味法院將監管清盤程序,即係嚟真。所以今朝起孖屐已經大規模走佬,到10點之後,正式宣布無得延期頒令清盤,恒大同旗下恒大物業(06666)、恒大汽車(00708)即刻先後停牌,停牌前恒大跌兩成,恒汽跌一成八,恒大物業跌2%。 時隔兩年終於要清盤,今次一停牌都唔知要停幾耐。有意見就話,清盤想清幾耐都可以,視乎複雜程度。欠債二萬幾億人仔有多,諗起都複雜,三五七年都唔定。計起清盤程序,優先次序一定係還曬債先到股,停牌前衝入去嘅死士,都唔知何年何月先可以攞返出來,呢種極限博反彈真係投機嘅最高境界。 雖然恒大清盤睇落係壞事,但今日內房股都無大跌,普遍都報升,就知恒大清盤並未有所想咁壞。恒大歷經七次聆訊先正識清盤,作為神州有史以來最大型嘅爆煲,阿爺當然已經推演好恒大清盤之後會發生嘅情況,將風險由不可控變成「可控」,畀足時間孖屐消化同適應。而近期阿爺由降準做頭炮,開始出手救市,恒大又「咁啱」呢個時間點先宣布清盤,當中都包含咗好多風險管控,令到今日恒大清盤嘅消息達成「軟著陸」。 雖然大家常用「梅菲定律」形容「壞事必然發生」,但其實正確嘅解釋係「所有有可能發生嘅情況都會發生」,當意識到呢一點,其實就要做好任何一個情況發生咗之後嘅應對方法,如今結果來睇,大家都早有準備。不過要留意就係,當初由恒大引發出來嘅問題,已經唔單只係個別公司嘅問題,牽連已經去到全個神州樓市,甚至係經濟層面。解決咗恒大,恐怕未來仲要經歷一段長時間嘅餘震,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇