《魚缸博客》神話世界（００５８２）公布，建議每１０股合併為１股，股本重組生效後，每手買賣單位由１２００股更改為６０００股。此外，該集團建議每持１股合併後的經調整股份供２股方式集資約２﹒５８億元。該股今日復牌後，股價急跌逾兩成。　　睇返隻股票，原來係做綜合休閒及娛樂度假村、博彩及娛樂設施，同埋物業發展。瓣數唔少，營業額亦唔細，舊年做成１０億銀生意，只可惜做１０億銀就蝕５億銀。過去５年都仲未見到有錢賺。股價年幾前仲係３毫幾，今日仲一度跌穿３仙，即係年幾就唔見咗九成。有貨在手嘅小散戶，真係一殼眼淚，諗住創造神話，點知神話破滅。　　有朋友對於１０合１，然後再１供２表示驚訝。其實，呢種做法司空見慣，在港股特別是一些毫子股或仙股裏面經常出現。莫講話１０合１，就算２０合１，甚至４０合１都如家常便飯。有啲２０合１都未夠，再來１供４之類的更是等閒事。呢個就係港股嘅特色，上市企業中意幾時合股就合股，供股就供股，完全睇唔到有任何規管。　　曾經有個內地朋友，間中都有投資港股。有一次，佢興高采烈咁同我講，話佢買咗隻仙股，話股價跌到咁低，跌無可跌，仲話坐住等股價翻倍。佢唔知道香港股票可以合股再供股，所以咁有幻想力！我一問之下，佢買嘅竟然係一隻出咗名嘅「老千股」。講得話係「老千股」，係因為搜尋器入面，唔同群組都有嗰隻股嘅大名。朋友聽完即刻肴底，排隊賣返出去，佢都算好彩，只係蝕少少，起碼走得切。時隔多年，筆者今日專登按入去睇下隻「老千股」，股價今日表面上升呢做毫子股，但其實碌返去朋友當年買入的價格，相當於幾百蚊。可想而知，個潭有幾深。當然，我又唔係話平嘢一定無好嘢。但千祈唔好貪平買嘢，因住「偷鷄唔到蝕把米」！（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】哈馬斯領袖被暗殺伊朗揚言報復以色列，你認為中東局勢會否升級？► 立即投票