26/02/2024 16:56
《小傳日記》恒物炒起有春江鴨?幾百蚊快車你搭唔搭?
《小傳日記》魚缸上個禮拜升到去百天線,到今日明顯就有啲腳軟,話曬都係差唔多七個月以來第一次再見到百天線,咁耐無見都梗會有啲怕醜,希望財爺會畀啲鼓勵啦! 今日唔算有啲咩大升大跌,不過一眾物管股就忽然撇低阿媽獨自造好,結果就係內房股跌但係物管股升。其中放完晏之後,恒大系嘅恒大物業(06666)忽然勁抽,連同隻恒大汽車(00708)齊齊升,最後恒大物業勁升逾三成四,恒大汽車扯高一成七。 盤中全日都未見到有咩特別消息,不過恒大物業連同物管同行咁升法,一定有啲原因。目前恒大(03333)清緊盤停咗牌,旗下兩隻股咁樣升法,好有可能債權人喺傾緊會接受恒物股份抵債都唔定。物管股一直都被認為係內房板塊入面風險比較低嘅業務,因為需要投入嘅資金較少,比起發展商,物管股屬於輕資產,負債情況一定輕得多,亦係債權人喺內房爆煲之後最有興趣收入囊中嘅業務。 根據恒大物業最新上年份期中考成績表,純利係按年升四成三,毛利升一成七,毛利率都升2﹒2個百分點到24﹒4%,係仲有錢賺,所以債權人難免會流口水。而早前恒汽撲到紐頓水喉最後都係無行,如今仲有錢賺嘅恒物就最似係拆骨首選。 而今日連其他物管股都一齊升,包括國企背景嘅華潤萬象(01209)同中海物業(02669)都分別升差唔多5%同4%,所以炒起都有可能係政策因素。而單係物管股升而唔係連同發展商一齊升,都有可能係針對物管有政策推出,根據之前嘅牌路,可能會有鼓勵物管企業併購等等嘅消息都唔定。 今日普遍都係春江鴨掃貨,跟唔跟啲鴨,就要睇胃納。不過上面都講到恒大物業仲有錢賺,而PE都未夠五倍,用今日收市價7毫子計都未使一張大牛,買一兩手博多餐晏仔都算抵博,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇