《小傳日記》今個１０月份真係多事之秋，外圍走勢反覆，花旗國就Ｃｈｏｋ到暈，好彩上星期五（１７日）抽番高２６３點，總算執番身彩。今日（２０日）東瀛嗰邊就仲誇張，據指當地養老基金可能增加喺魚缸嘅投資比重，消息刺激日經平均指數爆升５７８點或４巴仙，勁！　　外圍升得咁精彩，加上人行又出手注資，再加上四中全會今日開幕，憧憬有好消息出台，Ａ股都踢高０﹒７巴仙，帶挈香江開市彈高２１６點至２３２３９，上番十天線（約２３１６３）。不過，望穿秋水嘅「滬港通」日期仲未有聲氣，而「佔中」又愈拖愈耐，雖然聽日（１８日）學聯同政府終於會面，但孖屐最怕傾完得個吉…總之就限制香江反擊。恆指收市得番４７點進帳，報２３０７０；國貨佬就威ＤＤ咁多，漲６１點收１０２９５。　　有咁多隱憂未搞掂，魚缸交投都拍烏蠅，只得約５３０億銀，係今年７月２１號以嚟最悶嘅一日。　　＊外圍靚到暈阿爺來錫錫，自身不明朗見高立即掟＊

　　１０月亦係企業派成績嘅月份，祖國移動（００９４１）收市之後公布第三季業績；雖然德銀同瑞信都唱反調，德銀仲話覺得收入增長無以前咁勁，決定將目標價降至８３銀，但收市都有１巴仙進帳報９２﹒８５銀。只可惜，最終成績令人失望，首三季少賺近一成至８２６億人仔，上咗船嘅缸友要坐穩啦。　　喺下星期二（２８日）放榜嘅祖國電信（００７２８）就合皮好多，全日抽高３巴仙收４﹒７８銀；唔單止衝破多條平均線，仲拎埋最佳國貨佬第２名！而星期四（２３日）派成績嘅聯通（００７６２）就呆滯企喺１１﹒４銀。　　手機相關股都有鑊氣，當中力拓中低端孖屐嘅酷派（０２３６９）靜咗一排後，最近都逐步向上踢高，今日仲袋咗逾７巴仙收高於廿天線樓上報１﹒４９銀。星期四放榜嘅中興（００７６３）都升咗近３巴仙收１７﹒３４銀。　　　　　＊大行有彈讚中移照踏前，大象將放榜瑞信踩一腳＊

　　中字派相對靚仔，但非中字輩嘅大象（００００５）下半場就突然無晒力，逆市碌低０﹒４巴仙收７７﹒５５銀，再一次跌近今個月７７﹒２銀最低位。睇番時間表，大象下個月３號就公布第三季業績，早幾日瑞信就估計，稅前盈利可能按季唔見３巴仙至６２億美金，維持「遜於大市」，下望６９﹒９６銀，唔通因為咁嚇走班粉絲？！　　另邊廂，過去一個月唔見咗逾１５巴仙，跌到「攤攤腰」嘅渣打（０２８８８）成功絕地反擊，上星期五低見１３１﹒１銀，創約３年新低後，今日由頭升到尾，埋單彈高近２巴仙收市報１３４﹒４銀，起碼嬴番個勢，之後先有力再衝過！

＊渣打撻到殘今天似否極，內銀各走各愈細愈美麗＊

　　講番阿爺向股份錢莊放水２０００億人仔嘅好消息，本來都令到班商銀開心過一陣，點知摩通潑冷水，話見唔到央行有大量放水嘅舉動；另一方面，巴克萊都叫缸友睇定啲，驚第三季不良貸款可能按年升６巴仙，並有持續上升嘅趨勢添！　　當頭捧喝下，錢莊升幅都收番啲，交行（０３３２８）本來升２巴仙，最終嘔番晒出嚟，埋單時無升跌報５﹒４９銀。信行（００９９８）、民行（０１９８８）就比較硬淨，各升逾１巴仙及近２巴仙，收４﹒８６銀及７﹒４５銀。至於四大國有錢莊就要企埋一邊等等，建工中農就連１巴仙升幅都無，認真失威。

＊四中今開幕新能源起舞，軍工續急回照明失光芒＊　　　四中全會今日開幕，雖然暫時仲未有任何重大利好政策出台，但係一班新能源股都率先炒高，當中協鑫（０３８００）、協鑫新能源（００４５１）兩父子就搶晒風頭，囝囝仲係五十大成交額入面升得最勁嘅一個，埋單以約１﹒９億銀飆升１８巴仙收３﹒９３銀，並一度再創上市４﹒０２銀新高添，而阿媽都有逾２巴仙落袋收２﹒６１銀！風電股代表就由金風科技（０２２０８）同龍源（００９１６）做代表，各踢高４巴仙及５巴仙。　　軍工股風光咗咁耐，今日都繼續向下碌，中航國際（００１６１）、中航工業（００２３２）就各瀉逾１６％及１３％；半新丁之一嘅壹照明（０８２２２）都形勢告急，一度跌到去１﹒７５銀新低，完場都仲要重挫逾１９巴仙收１﹒８１銀，慘！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式之　　　　　　　申述或訂立任何建議及推薦，讀者務請運用個人獨立思考能力自行作出投資決定　　　　　　　，如因相關建議招致損失，概與《經濟通》、編者及作者無涉。

【etnet 30周年】多重慶祝活動一浪接一浪，好禮連環賞！ ► 即睇詳情