《魚缸博客》昨日國統局公布，１月居民消費價格指數（ＣＰＩ）按年跌幅擴大到０﹒８％，跌幅係２００９年９月以來最大，比舊年１２月擴大０﹒５個百分點，差過市場預期。內地連續４個月通縮，而且有加劇嘅跡象。但統計局就話，數據係受到舊年同期春節錯月、防疫放寬後刺激消費需求增加，導致高基數所影響。如果按月計，１月ＣＰＩ其實升０﹒３％，連續兩個月上升添。　　市場亦有部分經濟分析師認為，內地食品價格下行周期已近尾聲，通縮情況就嚟見底，加上２月春節長假期效應，ＣＰＩ按年同按月都有望上升，今年中按年變幅有機會升１％左右。　　上面嘅分析啱唔啱暫時唔知。不過，過去幾個月，內地消費疲弱，進入通縮係事實。內需板塊尤其係食品飲料相關股份就跌到一仆一碌，跌足成年。康師傅（００３２２）由舊年高位１４﹒０２元，跌到而家大約７﹒７元左近。未夠一年，股價已經唔見咗近一半，明顯跑輸大市。查實，就算經濟差咗，社會整體消費弱咗，基層食品反而有機會上升先係。就算價格升唔起，需求量有機會升返，條數一樣唔會差。　　因此，無論係通脹定係通縮，對於康師傅呢啲同基層民生息息相關嘅行業，唔應該睇得太淡。睇返集團舊年中期業績，截至２０２３年６月止半年度，集團營業額升７％，股東應佔溢利更加增長三成，一啲都唔失禮，無理由股價係咁跌。而且，康師傅股息有成６厘幾，就算買咗都唔使慌。（ｖｓ）　《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇】巴黎奧運正式閉幕，今屆你感到最深刻的地方是？► 立即投票