15/03/2024 11:38
《魚缸博客》向飛機引擎投銀仔係習俗?國泰見好就收唔好跟太貼
《魚缸博客》上個禮拜,一班由海南島三亞飛去北京嘅航班上,有乘客喺登機時向飛機引擎投擲幾個銀仔「許願」,班機因此要延遲超過4粒鐘,該名乘客亦被警方扣留。該名乘客辯稱因為屋企人過咗身,需要按照習俗投擲硬幣祈福。事後所有投擲嘅銀仔已經揾返,確保唔會構成飛行安全後先起飛。筆者愚昧,真係唔知邊度鄉下嘅人有咁「先進」嘅習俗,事關鄉下好多老人連飛機都未見過,何來呢個習俗? 類似事件過往喺內地都周不時有發生,包括2017年、2019年和2023年都曾發生過,好彩幾次都無造成任何飛行事故。根據內地《治安管理處罰法》規定,呢種行為屬於嚴重擾亂機場秩序,最高可被拘留十日同埋罰款人仔五舊水。可能係罰則無乜阻嚇力,難以杜絕啲人冒住自己生命危險去「祈福許願」。其實睇返上述罰則,又的確唔夠阻嚇力。試諗下,航空公司要派人執返銀仔不特止,仲要派人檢查飛機引擎;成班機咁多乘客同服務人員都因呢件事浪費咗4個鐘。呢條數點計算?區區5舊水罰款算得乜嘢?所以,一日唔提高刑罰,估計呢類事件日後陸續有來。 遇到呢類特殊客戶都幾頭痕,唔單只浪費人力物力,仲隨時被旅客埋怨。所以航空公司真係一啲都唔易做。油價高企時要挨貴油;油價跌時,雖然可以降低成本,但作為對沖的投資產品又要蝕錢。經濟放緩,市道差時就更加唔使講。特別係過去幾年,遇到前所未有的疫情,搞到全世界航空公司都無啖好食。好彩雨過天晴,國泰(00293)前日派成績表,疫情之後首個年度有錢賺。亦係2019年後首次派息,真係飲得杯落。其實,國泰疫情後的股價低位一早喺2020年出現,之後呢幾年就算無錢賺,股價都反覆上升。前日派成績表後,股價向上衝過一輪,呢兩日回歸平靜,而家仲炒唔炒得過?上面空間太小啦,要揀都揀內地同業啦,股價畢竟仲係低。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇