04/01/2024 16:59
《小傳日記》榮辱互見!理想爆標股價行先,長汽唔夠數跌到賤!
《小傳日記》2023年過去,新能源車可以話係上年神州競爭最激烈嘅板塊,唔計其他新勢力,剩係蔚小理三間都已經有一場惡鬥,仲要搵埋外援來cap水。最終就理想(02015)跑出,銷量勁升之餘股價都升,全年勁升九成二,半路染藍仲成為埋最佳表現藍籌! 有贏家就有輸家,有報道就總結咗上年咁多間新能源車廠嘅表現,其中理想完成目標率達到125%榮登榜首,相反由食油車轉型嘅長汽(02333)就只能完成目標嘅四成一,成為最差表現新能源車企,所以噚日就要捱沽跌4%有多。 長汽1號公布2023全年賣出新能源車26﹒15萬架,按年賣多九成八。但係上年初長汽定下年賣64萬架新能源車嘅目標,雖然比起之前280萬架已經大幅調低目標,不過最終都係meet唔到target。 長汽主要靠旗下「魏牌」來賣新能源車,造車初期都好風光,旗下VV5同VV7月賣過萬架,不過一觸即發嘅新能源車大戰殺到來,魏牌就被唾棄,去到上年新出「藍山」同「高山」,最多試過每個月賣5000架以上,但之後都無以為繼。魏牌全個2023年,只係賣出接近5﹒3萬架,大幅跑輸同行。 品牌管理不善,連管理層都不斷變。魏牌2016年成立,到2023年嘅七年之間,已經換過八次CEO。雖然董事局希望換人來拯救公司,但係換極都唔得,令員工同孖屐同樣不安。魏牌上年更加一度推出「0元購」,即係只要完成到目標,就可以零成本得到公司股份,不過都係救唔到銷售頹勢。 而家新能源車競爭咁勁,不進則退,無方法搵錢就只會愈來愈慘淡,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
夏日中暑高風險!即睇中暑迷思+預防措施!► 立即了解