16/01/2024 16:46
《小傳日記》魚缸又穿底!表現咁曳,抽新股都唔係好計?
《小傳日記》魚缸捱咗個幾月,終於都係守唔住16000,又再跌穿,仲要穿埋上年低位15972,都唔係「試穿」咁簡單,跌到15800水平,搞到而家個個都唔敢估底。個市咁衰,但係據統計,至少有60幾間公司申請緊來魚缸上市,究竟係上面公司睇好魚缸見底,定係港府招商引資有料到呢? 中國證監會資料顯示,今年以來已經有14間公司獲准境外上市,未來仲有91間排緊隊,等緊「補充資料」或者去到「已接收」階段。91間入面,當中有接近三成係去Nasdaq,另外超過七成都係準備來魚缸,換算即係約莫60幾間。 的確近期都係多咗好多IPO新聞,當然全部都係神州公司,雖然有部分都有QQ(00700)、巴巴(09988)等等做基石投資者,不過除非係某啲大型股份分拆出來嘅,好多都比較不知名,有時抽完都唔知係咩,係得蜜雪先咁隆重,專登申請上市前開間新舖造勢,即管睇吓會唔會抽得熱門啲。 以前嘅新股IPO,必然會見到超額認購幾多幾多倍,如今就周不時都會見到唔夠一倍,即係根本唔足額,反應係超淡靜,因為好多根本就未聽過係做咩嘅,或者有啲物管股都照上,內房咁嘅情況又邊個敢去掂。 奀股爭住上,大股又唔上。近期最有睇頭嘅新股相信都係藥明合聯(02268),既有藥明系背景,又真係賺錢,先真係值得抽嘅新股。如果不知名唔肯定賺唔賺錢,就算搞完IPO,炒完新股嗰一轉結果都係無人炒。近期都有好多大股曾經傳會上市,包括巴巴大大聲叫分拆盒馬、菜鳥同阿里雲,最後都係縮沙;仲有傳咗好幾年嘅富衛,早兩年都嫌個市唔得,如今就更加唔得,結果一直都只聞樓梯響。 IPO係多咗,但如果都係奀股,無人炒結果對於增加成交都係無幫助。以投資者角度睇,炒呢堆奀股最多都係炒頭一浸,然後就無然後,賺嗰雞碎咁多一個唔覺意又跌咗去,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
【你點睇】中環海濱充氣奇蹟展展品外貌惹網民嘲笑► 立即投票