《小傳日記》噚日聯交所大鑼大鼓，連財爺都親自到場，就係為咗幫魚缸第一隻１８Ｃ股晶泰科技（０２２２８）敲鑼造勢。　　「１８Ｃ」其實即係《上市規則》〈第十八Ｃ章〉提到嘅特專科技公司上市，新規上年３月底正式生效。新規提到嘅「特專科技」（Ｓｐｅｃｉａｌｉｓｔ　Ｔｅｃｈｎｏｌｏｇｙ）涵蓋五個科技專業：（一）新一代信息技術；（二）先進硬件及軟件；（三）先進材料；（四）新能源及節能環保；及（五）新食品及農業技術；而晶泰科技就算係從事「先進材料」嘅公司。　　１８Ｃ新規容許未商業化嘅特專科技公司上市，但股份名稱後面要加個「Ｐ」字，即係類似Ｂ仔股咁，所以晶泰科技正式股份名稱係「ＱＵＡＮＴＵＭＰＨ－Ｐ」。晶泰以接近招股價下限定價，每股發售價５﹒２８銀，噚日開報５﹒３９銀後一度低見５﹒３１銀，今日最低都見５﹒３６銀，連續兩日都力保發行價不失。　　晶泰科技除咗係「１８Ｃ第一股」之外，亦都被稱為「ＡＩ製藥第一股」。據招股書第一段簡介，公司係基於量子物理、以人工智能賦能和機器人驅動嘅創新型研發平台，以ＡＩ同雲計算為製藥與及材料科學提供科研解決方案。其實簡單嚟講晶泰科技更加似係ＣＸＯ板塊嘅類別，綜合招股書入面對於業務嘅詳細描述，晶泰科技其中一項主業就係用一套ＡＩ系統，喺實驗室入面為客戶用ＡＩ運算唔同嘅分子，測試出邊一啲組合嘅結果係更加具有研究落去嘅可能性，大大縮短以往大海撈針嘅逐個組合測試嘅時間同成本。　　據晶泰科技提到，以往要發現新藥嘅先導化合物，傳統人工方法需時兩年半，用到ＡＩ就要大約十個月，而用上晶泰科技基於量子物理嘅ＡＩ運算，就可以喺唔夠兩個月內發現到先導化合物，更加獲得輝瑞青睞而達成長期合作。　　基本面確係好，但誠如招股書之中提到，美國《生物安全法案》一旦生效都會對公司有影響，而２０２３年來自美國客戶嘅收入已經佔總收入三成，即使仲有八年，但《法案》都會成為公司海外擴張嘅障礙，未來要視乎來自中國嘅收入有無得提升返多啲，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》【親子溝通】怪獸家長原來都有呢啲通病！相處有一件事切忌？► 即睇