23/02/2024 11:35
《魚缸博客》自由行可以幫到幾多?九置跌穿25元先考慮
《魚缸博客》香港近月來不斷議論「金融中心遺址論」同「香港已經玩完論」,係唔係遺址,係唔係玩完筆者唔敢講。不過,香港市民就有排都未玩完。玩完日本又玩韓國,玩完深圳又玩澳門,玩極唔夠喉。又難怪嘅,疫情期間,香港成個孤島咁,筆者最北去到荔枝窩,最南去到蒲台島,仲可以點?所以,開關之後,港人報復式外遊。遠嘅去日本、歐美及東南亞;近嘅去深圳、珠海及大灣區一帶,實行遠有遠玩,近有近玩。 只不過,香港人外遊踴躍,但來香港嘅遊客就唔見踴躍。根據政府統計數據,舊年開關後港人北上日均約16﹒1萬人次,但南下嘅內地旅客日均只得8﹒2萬人次,日均逆差近8萬人次。就算內地10﹒1黃金周假期,南下旅客1日最多亦只得17﹒8萬人次,遠低於疫前2018年黃金周入境高峰26﹒1萬人次。眼見人潮淨外流,流走埋消費力。消息指,特區政府唯有向中央求助,要求放寬自由行城市數目,刺激本地零售業。近日中央終於點頭,雖然具體細節仲未公布,但消息已經令一眾高官興奮不已。 增加自由行城市,得益者除咗珠寶店,藥妝店之外,擁有海港城和時代廣場地兩大地標式商場嘅九龍倉置業(01997)自然係另一得益者。集團股價昨日開市無耐一度興奮咗一陣,五分鐘圖顯示由25﹒95抽升到27元,收市仲係挨住呢個價。不過集團股價今日回跌,而且跌幅大過恒指。昨日同業希慎(00014)出業績,市場明顯唔收貨,預料九置都好唔到去邊。所以,想炒九置要等一等,等股價落返25元樓下先考慮。(vs) 《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇