《小傳日記》記得去年今日，環球市場都睇住美國出現嘅銀行系統風險，時隔一年，就輪到神州出現金融系統風險，苟延殘喘嘅中植終於啱啱過去周末宣布申請破產！　　中植以不能清償到期債務，資產不足以清償全部債務，而且「明顯缺乏清償能力」為理由，向北京法院申請破產清算。其實由上年開始，中植已經聞到燶味，好多隻公司債忽然停止兌付，１１月底更加傳出北京市公安已經對中植系財富公司立案調查，對解某某等多名犯罪嫌疑人採取刑事強制措施，而「解某某」就被指為中植集團副總裁解子征，亦正係已故創辦人解直錕個侄。　　解氏家族被孖屐認為喺神州有著極雄厚實力，皆因除咗解直錕嘅中植系，佢阿哥、即係解子征阿爸解植春係前中央匯金總經理，中央匯金實控多間重要國企，兩兄弟曾經一個管國企，一個管民企，喺神州金融市場獨佔鰲頭。不過中植系爆煲以來，包括解植春在內嘅解氏家族成員一直保持低調。　　中植喺神州樓市風暴初期一直表現積極，趁低撈入唔少高危內房項目，包括樂視大廈、中弘大廈等；又試過支持恒大（０３３３３）參與萬科（０２２０２）爭奪戰，據講恒大掃貨萬科有超過９億人仔都係來自中植；另外，中植都曾經「出手襄助」陽光城、融創（０１９１８）、世茂（００８１３）同華夏幸福等等，原本等佢哋過關之後可以撈一筆，可惜樓市不似預期，同內房坐埋同一條船嘅中植結果「先行一步」。據講阿爺由上年１０月已經決定拍板中植破產，到而家為止只係大約三個月時間，有意見認為反映咗上面對於遏制金融風險嘅取態同力度，以及保護金融體系嘅決心。　　中植作為一間資產管理公司，雖然涉獵多瓣，但係債權人大多係個人為主，對其他金融機構實際波及較細，心理影響先會比較大。而比起中植，仲吊緊命嘅恒大更加有過之而無不及，涉及更大量機構債權人，甚至係外資，一破產引起嘅風浪絕對比中植更大，所以今次中植爆煲，可以話係預先推演萬一恒大清盤之後有機會出現嘅概況，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

樂本健【雙11感謝祭】雙重優惠、多買多賞► 了解詳情