15/04/2024 16:59
《小傳日記》零售市道唔好,除咗等運到,仲有乜嘢可以做?
《小傳日記》北上消費時隔十幾年再次成為主流,不過當年港人會北上,同胞會南下自遊行,上面下面人人有錢賺。但係而家港人愛北上,但同胞落嚟反而唔好使錢,令到零售行業都牙痛咁聲。 近排莎莎(00178)同周大福(01929)都出咗今年頭三個月嘅成續表,身為藥妝同金行龍頭,兩間老牌子都表現麻麻,內地同店銷售都分別要跌23%同跌2﹒7%。雖則話要吸引同胞來港消費,但係莎莎同周大福都一早喺上面直接開舖,結果表現都係唔得,即係無論本地定內地市場都賣唔好。 有趣係莎莎同周大福各自係低消費同高消費嘅零售代表,但係一概生意差咗,證明並唔只係奢侈品少咗人買,連平價嘢都一樣。以前同胞鍾意嚟香港掃貨,主要都係「港牌效應」,喺香港買有正貨保證,當年走水貨返上去加個「港版」就可以貴啲。但係近年上面大牌子多咗,監管改善咗,上面買日用品都無以前咁擔驚受怕,唔落嚟都已經買到好嘢,「港版」自然無咁韾香。 疫情尾聲大小零售商都呼天搶地嗌「通關」,政商界都落力游說政府,之後終於事成,但一年幾以來,零售市道恢復都恰如老鼠拉龜,「通關就會好」由頭到尾都只係零售商嘅良好意願。當「港牌」嘅光環退去,比起繼續祈求同胞落嚟會使多啲錢,更重要就係重建「港牌」嘅特色。 而其中一個特色好常見,喺神州嘅文化符號入面,「港味」就係懷舊嘅感覺,有部分牌子都有捉到呢一點。但係一味懷舊,終歸都只係舊,舊中帶新先係未來應有嘅方向。莎莎、周大福等等老牌子一路都係主力傳統嘅推廣策略,但神州嘅互聯網應用比起香港更發達,如果舊牌子可以更活用線上宣傳,更加貼近消費者脈博,應該可以引起更大宣傳效果。 同樣,要吸引返本地人,亦係同樣道理,要貼近本地消費者脈搏,如果可以活用到社交媒體宣傳,除咗接觸更多客群,更重要係建立返後生嘅品牌形象。所以無論要改善內地定係本地營運表現,最重要就係創新同貼地,再一味「等運到」而唔主動出擊只會坐食山崩,請請! *編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文只供參考之用,並不構成要約、招攬或邀請、誘使、任何不論種類或形式之申述或訂立任何建議及推薦,讀者務請運用個人獨立思考能力自行作出投資決定,如因相關建議招致損失,概與《經濟通》、編者及作者無關。
《說說心理話》運動員強大心理質素如何煉成?張小倫分享最挫敗經歷,及後怎樣重整旗鼓?► 即睇