• 恒指
  • 20,804
  • +725
  •  大市成交 2,591億
  • 期指(夜)
  • 20,782
  • -78
  • 低水22
  • 國指
  • 7,472
  • +293
  • 紅籌
  • 3,958
  • +110
  • 科指
  • 4,601
  • +251
  • 上證
  • 3,262
  • +92
  •  成交 8,279億
01/08/2014 17:39

《小傳日記》花旗魚缸笨豬跳,香江淡友反擊了!

  《小傳日記》今朝一睇新聞,見到台灣高雄發生燃氣管道爆炸,成條街炸開咗,嗰一刻只希望唔係事實…近日全球又發生咁多慘事,又打仗,又伊波拉、又空難,實在令人感到哀傷。小傳盼願所有死者能得到安息,世界和平。  講番魚缸先,噚晚(31日)花旗國嗰邊跌得好轟烈,美聯儲局突然上調對經濟前景睇法,缸友即刻驚「息魔」提早來臨,加上數據唔多掂,阿根廷又出現債務違約,搞到道指完場重挫317點收16563,係近半年嚟最大單日跌幅。  外圍立立亂,A仔場衝破2200關後,今日都回一回氣,而恆指全日亦唔見224點收報24532,「八連升」正式劃上句號。但其實美股跌得咁激,好彩有強勁嘅祖國PMI數據撐住,香江先唔使大跌市咋,都算係執番一身彩!至於國貨指數就唔見147點收10982。  今全日成交有約799億銀。

*花旗好曳曳PMI靚仔,香江要回氣今天跟個曳*

  今日推跌個市嘅「元兇」,就係早幾日發力嘅香江地主!當中傷得最重嘅,就係啱啱放完榜嘅超人(00001)。雖然同埋囝囝和黃(00013)嘅成績表都夠靚仔,多間大行都出力唱好,高佬、瑞信、瑞銀都齊齊調升目標價,點知都唔夠大淡友里昂嘅威力勁,里昂決定將超人踢出買入名單,兼降級至「優於大市」,搞到超人重挫近5巴仙收143﹒6銀,成為最慘敗大隻佬。和黃就爭番口氣,逆市輕輕踢高0﹒2巴仙。其他地主街坊都驚咗「息魔」,結果齊齊唔見1至2巴仙。  仲有祖國地主都要喺高位碌番落嚟,雖然今日又有傳聞話天津都全面開放限購,但都阻止唔到淡友攻擊。喺午飯時間放榜嘅祖國海外(00688)上半年盈利增長放慢至18巴仙,結果收跌逾2巴仙,其他街坊都跟市回吐番DD。

*超人急插水地主怕息魔,寶哥哥放榜總算企得穩*

  講真,過去嗰八日魚缸日日係咁衝,就算幾有實力嘅大隻佬都嗌攰啦,再加埋花旗魚缸咁插法,大家都難免乘機唞唞氣啦!50隻大隻佬入面,足足有39隻都要向下碌,得10隻仲有少少力衝,1隻就唔識郁。  友邦(01299)係其中一隻繼續衝嘅大隻佬。缸友見魚缸有啲調整,又唔知會調整幾耐,為穩陣起見,梗係揀個安全大水泡啦!友邦夠大隻業績又省鏡,就最適合做資金避難所,今日仲一度破頂見42﹒5銀,收市報42﹒05銀踢高0﹒5巴仙,認真勁!  另邊廂,東亞(00023)食午飯時派成績表,上半年多賺6巴仙賺35﹒8億銀,好過孖屐預期;雖然整體息差收窄咗,但成張成績表都算係不過不失,兼且寶哥哥仲宣布會做多三年掌舵人,唔怪之得股價都企得穩,只係跌0﹒6巴仙啦!

*電力有實力逆市發光芒,阿爺夠關顧煤炭不失禮*

  雖然個市無晒力,但電力股都有唔錯表現。話說祖國發電五巨頭改革路線似乎有啲微目,有內地媒體話五巨頭近排加大咗資本運作力度,其中華電集團會推進華電國際嘅資產注入,成個電力板塊當堂生猛曬。華能(00902)、華電(01071)分別踢高2﹒7巴仙及逾3巴仙,收報8﹒9銀同4﹒94銀。藍戰士潤電(00836)就無咁威,但都逆市升0﹒2巴仙。  至於電力股嘅好朋友,煤炭股亦齊齊逆市造好。噚日祖國召開煤炭行業脫困工作會議,要求煤企嚴控超能力生產,同限制不安全生產同化解產能過剩嘅問題。消息對於啲煤炭大隻佬當然利好,神華(01088)升逾1個巴仙收23﹒3銀,係最威水大隻佬。兗煤(01171)完場前發力倒升逾1巴仙,中煤(01898)就輕輕升0﹒4巴仙。

*大和來力撐濠賭跟市跌,賣國產偉哥白雲山埋鑊*

  今日濠賭股都有消息,7月份濠賭博彩收入一如預期跌3﹒6巴仙錄284億澳門元;勉強算比預期嘅3﹒8巴仙好少少,總算有個交代。大和就出報告支持,話相信弱勢已經見底,仲開始見反彈;故此,上調銀娛(00027)、美高梅(02282)嘅評級至「買入」,但兩股就唔多領情,同跌逾2巴仙。至於獲升目標嘅金沙(01928)亦跌2巴仙。另一方面,永利(01128)、澳博(00880)雖被降「他劇」,但兩股僅跌1﹒8及1﹒4巴仙,各收32﹒65銀及20﹒6銀。  近年涼茶股白雲山(00874)轉行賣「國產偉哥」,啱啱公布批藥獲阿爺審批完畢,賺錢嘅聲音漸近,刺激股價炒高8巴仙收26﹒8銀。此外,文化產業(00745)今突現7﹒09億股(佔已發行股本約一成),涉2﹒13億銀嘅特別盤交易,股價就插低9巴仙,收0﹒305銀,唔知係咪同之前配股抽水有關呢?假期愉快!請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性       本文只供參考之用,並不構成要約、招攬或邀請、誘使、任何不論種類或形式之       申述或訂立任何建議及推薦,讀者務請運用個人獨立思考能力自行作出投資決定       ,如因相關建議招致損失,概與《經濟通》、編者及作者無涉。

【你點睇】特首發表最新一份施政報告,你是否滿意?你最滿意邊項措施?► 立即投票

備註︰

即時報價更新時間為 18/10/2024 18:00

港股即時基本市場行情由香港交易所提供; 香港交易所指定免費發放即時基本市場行情的網站

股票
即時報價
全文搜索
Search
最近搜看
傾力救市
貨幣攻略
More
Share