《小傳日記》雖然兩大狂人「侵侵」同「肥仔金」之間嘅口水戰仲未平息，但花旗國魚缸連跌３日之後，上星期五（１１日）都終於有番啲起色，道指微升１４點。　　呢邊廂，香江魚缸經歷上日急插５６０點，今日亦嚟個反擊，朝早高開２０８點即重上二萬七大關，喺ＱＱ（００７００）、瑞聲（０２０１８）等領軍之下，之後更加愈戰愈勇，最多升起３８４點高見２７２６８，埋單計數就有３６６點或１﹒４巴仙落袋，收報２７２５０，一舉收復埋廿天線（約２７１９２點）添！　　即使神州７月份多個主要經濟數據增速都回落，消費品零售總額、城鎮固定資產投資都比預期差，但Ａ場滬指依然收穫２８點，報３２３７。國貨佬亦斬穫１３４點報１０７０７。　　魚缸暫且走出美朝關係緊張嘅陰霾，但缸友都未敢輕舉妄動入貨，全日總成交８５１﹒７５億銀，比上星期五少近３９巴仙。

＊染藍呼聲高舜宇表現好，或納入國指瑞聲要衝刺＊

　　舜宇（０２３８２）今日將放榜，加上後日恆指季檢，孖屐估計舜宇好大機會取代之前因為被私有化而被踢出藍戰士行列嘅百麗（０１８８０），結果衝前近８巴仙，報１０３﹒８銀。另外，國貨佬今個月會納入民企同紅籌，街坊瑞聲就有機會做埋國貨佬之一，最終亦彈起近７巴仙，報１１４﹒１銀，係最叻藍戰士。　　丘鈦科技（０１４７８）獲野村睇起，首予「買貨」評級，預料喺雙鏡頭採用率上升嘅趨勢下，丘鈦仲會有增長空間，佢即刻爆高近兩成，收１５﹒０６銀。　　其他科網股都好打得，股王ＱＱ後日出成績，率先反彈４巴仙，報３２４銀；埃芝芝（００７９９）就有超過６巴仙進帳，報１２﹒５４銀；影相神ＡＰＰ美圖（０１３５７）就跳起近３巴仙，報１３﹒２６銀。

＊摩通來撐場建行傲飛翔，化身小飛象恆生氣勢強＊

　　建行（００９３９）獲摩通唱好，估計佢經營開支減少、成本收入比例下跌嘅趨勢會持續，將「他屐」升到８﹒２銀，建行應聲彈高近２巴仙，報６﹒４５銀。其他神州錢莊都唔輸蝕，工行（０１３９８）、中行（０３９８８）衝高近２巴仙，報５﹒４同３﹒８４銀。　　內險亦齊齊發威，太平（００９６６）企高逾２巴仙，報２３﹒８銀。平保（０２３１８）之前獲摩通維持「增持」評級，今日跳高逾２巴仙，收５７﹒３５銀。　　本地薑小象（０００１１）就化身小飛象，飛起逾２巴仙，報１７８﹒９銀，仲一度再創歷史新高１７９銀。大象（００００５）亦都唔輸蝕，進帳１巴仙，收７５﹒５銀。

＊聯通發盈喜股價即彈起，擬減購置稅吉利衝前去＊

　　聯通（００７６２）預計上半年多賺近七成去到２４億人仔，雖然話下半年會有較大壓力，但喺匯證力撐上調「他屐」至１３﹒３銀之下，依然無有怕衝前近６巴仙，報１２﹒０２銀。中電信（００７２８）都跟住微微企高半個巴仙，收３﹒８銀。　　中汽協建議應該要為小排量、低能耗嘅砵砵車設置低Ｄ嘅購置稅，吉利（００１７５）踩油衝前４巴仙，報１９﹒２銀；街坊華晨（０１１１４）就駛前逾３巴仙，報２０﹒８銀；東風（００４８９）行前逾４巴仙，報１０﹒２２銀。

＊萬達再落鑊八日升倍半，裕元派特息寶勝亦招積＊

　　早排話會同王健林家族旗下公司重組資產嘅萬達酒店發展（００１６９）繼續落鑊，全日火箭式飆升近４５巴仙，報２﹒２銀，曾經創逾兩年高２﹒３９銀，佢８日夾埋大大話話已累升１﹒５倍！　　裕元（００５５１）上半年多賺４巴仙，花旗話雖然次季業績差過預期，但派特別息３﹒５銀有驚喜，結果裕元踢高５巴仙，收３３﹒８５銀。仔仔寶勝（０３８１３）中期純利倒退近兩成，但一於少理，照樣升起近５巴仙，報１﹒５１銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

【etnet 30周年】多重慶祝活動一浪接一浪，好禮連環賞！ ► 即睇詳情