《小傳日記》金融市場就係咁千變萬化，噚日魚缸先因為油組意外傾掂數，好友喺期指結算日打勝仗；點知噚晚（２９日）因為德銀受到客戶撤資傳聞打擊，股價暴瀉，市場即時掀起「歐洲版雷曼」恐慌。花旗魚缸亦被德銀嚇散，唔少大型銀行股都被拋售，搞到道指收低逾１巴仙或跌１９５點，收１８１４３，係９月１３號以來最大單日跌幅。　　外面烏雲密佈，香江魚缸又豈能獨善呢？恆指今朝跟外圍低開３０４點報２３４３５。３點鐘之後，歐洲魚缸開市，三大指數齊齊瞓低，德銀仲未止瀉創埋新低，大象（００００５）同渣打（０２８８８）即成拋貨對象，恆指一度蒸發５００點，收市都仲碌低４４２點或１﹒９巴仙，收２３２９７；國指跣低２１２點或２﹒２巴仙收９５８１，全日成交約７０４億銀左右。　　９月最後一個交易日，喺德銀風暴襲擊下畫上句號。總結恆指今個月都有１﹒４巴仙升幅，國指就微揚０﹒４巴仙；但第三季就分別有１２巴仙同近１０巴仙收穫，都算唔錯呀！　　　　＊德銀創新低金融股曳曳，恆指急插水好友甚閉翳＊

　　德銀風暴愈演愈烈，有傳部分對沖基金客戶撤資，孖屐擔心佢會出現財政危機，隨時變做雷曼２﹒０。德銀喺歐洲魚缸跌穿埋１０歐元大關，創紀錄新低，一班錢莊都憂心忡忡齊齊腳軟，大象、渣打都唔見咗近２巴仙，收５７﹒１５同６２﹒３５銀。本地錢莊東亞（０００２３）跣低逾４巴仙，報３１﹒４５銀，仲係全日最曳藍戰士。　　另邊廂，神州唔少城市陸續推出政策調控樓市，濟南提高住宅用地嘅競買資金門檻、南京亦暫停受理公轉商貼息貸款申請。磚頭佬中海外（００６８８）應聲踢跌近２巴仙，報２６﹒３銀；潤地（０１１０９）更加碌低４巴仙，埋單２１﹒６銀。

＊內房續調控陸發發心痛，光伏與風電忽然遇寒冬＊

　　阿爺突然話，打算出年開始大幅降低新能源標桿上網電價，甚至連光伏電價補貼都要縮水。一班光伏佬即刻嚇咗一大跳，驚之後盈利會唔見一大節；保利協鑫（０３８００）、信義光能（００９６８）瞓低近５同逾７巴仙，報１﹒０３同２﹒９銀；協鑫新能源（００４５１）更加趴低逾１０巴仙，報０﹒４４５銀。　　風電作為鄉里都叫苦連天，華能新能源（００９５８）、龍源（００９１６）直插１０同９巴仙，得返２﹒７同６﹒３銀。　　光大國際（００２５７）雖然獲大和升「他屐」到９﹒６銀，但評級就降至「持有」，結果亦碌低８巴仙，收９﹒２２銀。

＊匯鑫新登場急升後回順，招證甚麼價傳聞滿缸飛＊

　　今日有位新丁上場，匯鑫小貸（０１５７７）上場無耐就高見２﹒０８銀，高招股價（１﹒６８銀）近２４巴仙，不過之後慢慢回落番，首掛收１﹒８２銀，只高招股價逾８巴仙。大跌市下，唔計手續費，每手仲賺２８０銀，Ｌｕｃｋｙ！　　另外，招商證券（０６０９９）有傳未足額，但以中位數（１２﹒１６銀）或更高定價，過一陣之後又有傳１２蚊定價，略低於中位數。哎喲！好亂呀！　　賭仔今日向下走，里昂將澳博（００８８０）評級降至「沽貨」，佢今日唔見４巴仙，報５﹒７銀；兩位藍戰士金沙（０１９２８）同銀娛（０００２７）就跣低１至２巴仙。

＊里昂叫沽售澳博有點愁，航標遭洗倉渝太高高收＊

　　航標（０１１９０）開市無耐就被洗，無端端急插７８巴仙之後停牌，停牌之前報０﹒３５銀，試過低見０﹒２９５銀創新低，成交急增至２２２６萬銀，係今日最傷個股。但公司仲未公布停牌原因，有貨缸友唯有耐心等等吧！　　渝太地產（０００７５）開完會後決定每揸住１０３股分派２０股港通（０００３２）做特別股息。渝太炒高近３０巴仙，報６﹒２２銀，高見６﹒７５銀破頂，仲排升幅榜「冧巴溫」；但隻港通就冷冷清清，微跌近１巴仙，報１０﹒４銀。　　密迪斯肌（０８３０７）向豐盛（００６０７）折讓１９巴仙配股，引入新投資者，粉絲都好支持，密迪斯肌急漲兩成，報０﹒９６銀；豐盛就本來腳軟軟，但收市前都逆市升逾１巴仙，埋單報４﹒５０銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性　　　　　　　本文只供參考之用，並不構成要約、招攬或邀請、誘使、任何不論種類或形式　　　　　　　之申述或訂立任何建議及推薦，讀者務請運用個人獨立思考能力自行作出投資　　　　　　　決定，如因相關建議招致損失，概與《經濟通》、編者及作者無涉。

樂本健【秋日開倉26 - 27/9】保健品低至$20！► 火速行動