走進深水埗黃金電腦商場，電腦手機配件花多眼亂，不時發掘到新產品，如唱K神器、磁能線等。假日時，不少人喜歡到黃金尋寶，四周格價買心頭好。在這裏，有數百間大大小小的店舖，以平價、款式多做招徠的盈竣科技有限公司（下稱A Grade），受不少買家歡迎，背後隱藏住一個港人奮力向上的故事。

 

　　現年44歲的港人彭煒城，中學畢業後投身職場，1994年起在這裏學砌機做Sales，做足9年，至2003年開設自己舖頭A Grade，其後生意愈做愈大，高峰期門市年生意額過億元，6年前創建自家品牌XPower，賣起手機充電器、充電線、旅行轉插等配件，兼營批發和零售生意。

 

　　彭煒城堅持將科技、潮流數碼新玩意帶入「腦場」，如紅極一時的唱K神器，他亦是香港代理之一，4個月間賣過7萬枝，瘋魔全港。且聽他如何在黃金打滾25年，使出4招留住客人之餘，亦賺盡口碑和生意。

　

3大最暢銷產品

　

　　充電線，月售逾2.2萬件

　　手機充電器，月售逾1.8萬件

　　火牛，月售逾1.2萬件

　

黃金打滾25載 4招吸客 零售批發 生意過億

　

　　深水埗黃金商場，是著名的「腦場」，自九十年代起砌機賣電腦聞名，其後引進多款新產品如MP3、MP4、PMP，至近年大熱產品唱K神器，都不難在黃金內找到。要在眾多同類型的舖頭下競爭，談何容易。現年44歲的彭煒城（Marcus），在黃金打滾廿五年，多次早着先機，率先引進新產品，他人生有超過一半時間都在黃金渡過。

　

　　1994年，彭煒城在深水埗黃金商場打工學砌機（組裝電腦），仍記得當初入行的種種辛酸，「試過開頭唔識整，燒咗粒CPU，腳（火牛）插錯方向。」觸電、被尖利的底板鎅損手，他早已見怪不怪。入行初期，正值電腦興起，「一開始入行，砌機、Sell機，當時未有電腦配件，淨係賣硬件和軟件，裝吓軟件。」如今Windows已發展至Windows 10，他當年入行時，Windows只是3.1版本，未有CD、DVD出現，單是安裝該軟件都要用近20隻磁碟。

　

　

彭煒城（Marcus）

　

‧現年44歲，中學畢業後投身職場

‧1994年，19歲的他在深水埗黃金商場學砌機，打了9年工

‧2003年，沙氏期間，終在黃金商場覓舖位，斥資60萬元開設舖頭A Grade Technology Ltd.，高峰期單計門市年生意過億港元

‧2013年，開設自家品牌XPower，售過百款充電器、充電線

‧XPower產品批發至澳門和東南亞國家，單計澳門，已有約60家店舖或品牌採用，如澳門電訊、新八佰伴等

　

賣MP3帶挈生意

　

　　回想在黃金做Sales的年代，每日朝9晚8，原本底薪只有萬幾、兩萬元，但憑住勤奮向上的心態，他曾試過每月賣出過百部電腦，連同佣金，好景時，月入3、4萬不是夢，「當時砌機，類似三、七分（帳），Commission由幾千至萬幾都試過。」自小對電腦有興趣的他，不時看電腦雜誌，經常打機、上網，最初抱住「試下」心態入行，做了9年打工仔後，發現自己喜歡這一行，索性自己開舖做老闆。

　

　　「當時我係度諗，既然經驗我有，技術我有，客源都有，點解我唔試下再行前一步，自己創業做老闆，搵大錢呢？」彭煒城儲了30萬元開店，另向母親借30萬元，合共斥資60萬，終在2003年沙氏期間，在黃金覓得舖位開舖，舖位400多平方呎，月租3.8萬元，賣各種電腦和手機配件。

　

　　「沙氏時同前同事一齊走，大家都覺得有晒客路，知道點訂貨，咩產品好賣，亦有熟客帶過來（新店）。」有多年Sales經驗的他，從沒想過自己創業會「失敗」，更連蝕9個月。「黃金商場有好多大龍頭，不少舖頭大我哋好多倍，有好多分店之餘，亦有好多熟客，更有舖頭做了十幾年以上。」，論產品，款式亦不如大舖多；論價錢，小店入貨量少，成本較高，難靠平價殺出重圍，「舖頭唔夠大，我唔可以每個牌子都入得齊，只可以揀最好賣嗰幾款，大舖淨係Case都擺70、80款，但我唔夠位擺，只擺到十幾款。」

　

　　「自己蝕錢唔緊要，但輸阿媽嘅錢，難交代又無面，好多晚瞓唔到覺，亦試過有晚喊住瞓。」幸好，這樣的情況只維持了9個月，直至舊同事介紹他引入MP3，形勢逆轉。「當時全個場都無賣MP3，就諗住試下賣，賣400幾蚊，成本只係一半，差唔多賺一倍。」其後，彭煒城將自家舖位一半的位置都劃成MP3專區，更專程返大陸搵新貨，店內放滿各種牌子和顏色的MP3，「成個場無人做，得我做，任我標價，變咗專家。」MP3暢銷，連帶其他電腦手機配件開始「有人買」，鄰近商店爭相效法，引進新產品，「我引進40、50款，他們先開始賣，有幾個品牌知我賣到MP3，畀咗全場獨家我，包全場經銷。」

　

位於葵興的辦公室，佔地過萬平方呎，集貨倉、辦公室、批發散貨場於一身。圖為部分批發特價產品。

　

返大陸親自尋寶

　

　　由MP3，到記憶卡、USB手指，彭煒城都是採取「款多量少」試水溫，「每次都係款多量少，咩款都有，試幾件先，賣到先攞幾十件，甚至100件。」另外，他堅持新產品「要比人快」，就算是不知名的品牌都會照樣入貨，「好似記憶卡、手指，咩品牌都攞，攞到成個櫃筒都係。當時記憶卡啱啱出，1GB、2GB、4GB、8GB，到最貴32GB都拎，我唔理平貴，心態係要齊（款），要做到人無我有。」遇到銷售麻麻的產品，亦只有打價格戰，「做特價清咗佢，因為（同類產品）利潤高，所以其他款平啲清咗佢。」

　

　　第一間舖經營了3年後，彭煒城細舖換大舖，「有行家嚟參考、影相，有部分是過嚟拆貨。」彭煒城稱他是首批親自到內地攞貨的人，自2003年底已經開始返大陸「尋寶」，「無人學我咁癲，第一好辛苦，自己去搵貨。有時補貨賣晒就去密啲，一星期一次唔夠，就上去兩日、三日。」除了在內地親自搵貨，發掘新貨品，彭煒城亦不時留意電腦雜誌介紹，緊貼新潮流，「腦場不少商家概念仲係舊模式，好少好似我咁，追科技、潮流、數碼，我專玩新科技，將特別嘢帶落腦場。」

　

各大平台落廣告

　

　　經營門市生意上軌道，加上深水埗近10年都有舉行「腦場電腦節」，不時以「1蚊買電腦」等平價優惠吸客，連帶生意大增。好景時，彭煒城的舖頭試過門市年生意額試過以億計，單是4日電腦節生意額過200萬元。不過，他的野心不止於此，近年手機充電器（港人俗稱『尿袋』）賣到成行成市，但代理食水深，利潤低，他索性在東莞清溪設「尿袋廠」，2013年起建自家品牌X Power，賣尿袋、電話線、耳機、旅行轉插等。

　

A Grade售賣各種手機、電腦配件，以平價和款式多聞名。

　

　　新品牌落地，最初同樣無人知曉，「開頭都係大獲，舖頭賣，一間公司賣得幾多，每款每色『紮』過千件貨，賣得唔多。」但彭煒城反其道而行，推出更多自家製產品吸客，並在各大平台賣廣告，「公司見到廣告覺得有信心，我哋仲保證賣唔到可以換貨，如果有跌價會補差價。」

　

　　現時，XPower產品在各大舖頭都有其踪影，大至百老匯、中原電器、HKTVmall，小至手機配件舖都能夠買到，單是尿袋款式就約20款。品牌經營至今僅6年，去年生意額達8,000萬元，佔整間公司三分二的生意。

　

　　近年經濟轉差，社會氣氛不穩，零售業首當其衝，深水埗也是重災區之一。彭煒城坦言，市道較以往差，「香港情況我哋控制唔到，惟有放多啲時間係澳門，亦會放大Trading和網上生意。」

　

　　去年起，公司兼營網上生意，除了網店外，公司亦與網購平台HKTVmall和HOKOBUY合作，未來亦會發展Amazon和eBay，以及正籌備自家禮品網站，「就算香港生意跌咗少少，我係其他方面Cover返去」。

　　

唱K神器大賣 4個月賣逾 7萬枝

　

　　紅極一時的唱K神器，最初由不少明星試玩成功帶起熱潮，A Grade Technology亦是香港代理之一，4個月內賣過7萬枝。

　

容祖兒試玩唱K神器，在ig發布照片後，連帶唱K神器銷情大增。

　

　　彭煒城首批拿了1萬枝貨量，在1個月內已光速賣完，唱K神器全球熱賣，供應趕不上需求量，他更試過走到上海、深圳代理，「拆上拆」，希望搶到最多的貨，「當時我幾邊攞貨，因為HKTVmall賣咗，如果唔夠貨出貨，每隻每日罰30蚊。」他稱，唱K神器利潤高，「賣MP3累積計係賺多過唱K神器，但唱K神器係4個月內，已經等於MP3一年銷情。」問及他確實利潤如何，他未有正面回應，僅一笑帶過。

　

4大成功之道

　

1. 款多量少

　

　　每逢推出新產品，彭煒城總會購入所有品牌和顏色供客人選購，不過每次都是採取款多量少策略，先入5件，好賣的再加單。

　

2.搶先引進新產品

　

　　自小熱愛電腦的他，不時留意電腦雜誌和網上資訊，率先引進從未在腦場出現的產品，如MP3、記憶卡等。

　

3. KOL營銷

　

　　建立自家品牌XPower，花錢落廣告吸公司客和B2B生意，他們亦會將產品試用品送予各大KOL，務求以口碑取勝。

　

4. 價錢

　

　　彭煒城堅持每逢有新產品，必定會第一時間放上price.com，定價較同行低，吸引不少客人專程到實店選購。

 

港品牌推個人化尿袋 免費「鐳射雕刻」 吸客做宣傳

　

　　6年前彭煒城創立自家品牌XPower，至今推出逾20款尿袋和各種手機配件，並將尿袋包裝成禮品，只要尿袋表面是鋁合金物料，即可免費鐳射雕刻，印上指定圖案或字句，即使只買一件，亦會提供此服務；如尿袋表面是塑膠料，則可加30元作UV彩印。

　

XPower外置充電器，成為舖頭的最暢銷產品之一。

　

　　現時，XPower在深水埗店設有兩部鐳射雕刻機，另一部放置在葵興辦公室內，至於UV彩印服務則屬外判服務。

　

　　彭煒城平日外出應酬，偶爾會為賓客準備小禮品，將其名字或公司名印上尿袋，大收宣傳之效，「好多人想送份禮物，一定要實用，送Power Bank最實用，即使送酒畀我，如果唔飲酒，放一邊嘥晒，亦做唔到廣告效益，因為酒印唔到公司名、QR Code等資料，唔可以日日帶住（出街）。」

　

免費印名可款款不同

　

　　現時，不少公司都訂製「Tailor made」尿袋送予客人和員工，如洲際酒店、保險公司宏利、AIA、時代廣場、海港城、茶木和瑞士咖啡室等，「我哋每隻都可以Tailor made，無MOQ（最少訂購數量），仲可以每隻印唔同名。」一般禮品公司需印製500件或而上，且圖案或名字需統一。

　

購買鋁合金表面物料的外置充電器，即可免費以鐳射雕刻方式刻名和字句。

　

　　免費印名，還要每款不一樣，製作時間和成本豈不是大大提高？彭煒城解釋道，印刷鐳射雕刻只需10多秒，最花時間的原來是轉檔（Format），「最耐係轉檔，例如轉AI、JPG，其次係排位，最耐係印第一個，其餘只係轉字句和名。」不少公司客都喜歡印上QR Code和公司口號，一訂就訂數百，甚至數千件。

　

個人化市場潛力巨大

　

　　除了印名字、字句、QR Code外，彭煒城將尿袋包裝成聖誕、新年和情人節禮物等，「其實鐳射雕刻和UV彩印變化好大，例如UV彩印可以印畫、家庭相、貓、狗相等。」彭煒城甚至忽發奇想，考慮將尿袋變成新年禮物，舉例說，每年有某種生肖犯太歲，需要佩戴某些顏色和生肖飾物化解，他們可將生肖圖案印上去，並配合不同顏色的尿袋，不過他笑言，個人化市場非常大，能夠發揮空間好多，但自己仍未識得如何將這產品發揚光大。雖然免費鐳射雕刻非常吸睛，不過彭煒城透露，其實尿袋並非店內最暢銷的產品，最好賣的原來是充電線，「買線唔會買一條，一條Office用，一條放係車用，一條放屋企，一部手機至少3條線，所以銷量多過尿袋少少。」

　

UV彩印可印相和圖畫，需加30元。

　

眾籌逾66萬 推雙頭磁能PD快充線

 

　

　　2018年，XPower在眾籌網站Kickstarter籌得逾66萬元，推出全球首條支援PD雙邊磁能線，支援PD及Qualcomm快速充電及數據傳輸，能夠為Macbook、 iPhone、 Android、 Switch等充電。

　

攞齊安全認證 自家品牌尿袋攻連鎖店

　

　　短短6年間，彭煒城創立的自家品牌XPower，以小眾品牌而言，能夠打入連鎖店絕對不容易，他透露，連鎖店最着重的是安全認證，因為他們自家製的尿袋和火牛，設1,600萬元全球保險，已取得多張安全認證，尿袋更是每款取得至少4張證書。

　

　　產品在多間連鎖店有售，如CSL、衞信、中原、3、書局等，除了做足安全認證外，XPower曾長期在媒體賣廣告留住客戶，又送贈不少試用品予KOL試用和寫評價，尿袋設一年保養，半年內損壞可以一換一，「產品由最初得兩款，去到依家過百款，其中尿袋就由兩款變廿款，容量由3,000mAh至2萬mAh不等。」

　

轉載自《iMONEY智富雜誌》