《笑傲缸湖》１９世紀花旗國曾經興起一股淘金潮，估唔到今時今日花旗國依舊遍地黃金。繼盈盈上次提過，有人喺街邊攤檔搵到價值連城嘅蘋果絕版波鞋，最近花旗國又有兩名大學生周街「執到寶」。　　事源呢對大學生閒來走過一間就快執嘅救世軍二手店，喺一堆冷衫之間發現５藍１白嘅花旗國太空總署太空衣，仲以破底價每件２０美仙買咗。　　唔好以為１﹒２美金６件衫應該假過Ａ貨啦，太空總署事後印證呢批太空衣係堅料，其中一件印有「ｌａｕｎｃｈ╱ｅｎｔｒｙ　ｃｏｖｅｒａｌｌ（發射工作服）」相信喺１９８２至１９８６年穿梭機航天計劃中用過嘅，另外幾件印上「Ｇｅｏｒｇｅ　Ｎｅｌｓｏｎ」、「Ｒｏｂｅｒｔ　Ｐａｒｋｅｒ」就同當年嘅太空人人名一樣。　　盈盈好好奇，依批上世紀８０年代出產嘅太空衣究竟真正值幾錢呢？參考花旗國太空館嚟緊１１月舉行嘅拍賣，一件原來估價５０００美金！睇嚟盈盈得閒無事都要多啲去二手店逛逛，話唔定隨時發番個橫財呢！《任盈盈》

　　《編者按》本欄搜羅即市傳聞，惟消息未經證實，《經濟通》亦不保證內容之準確性。

《說說心理話》關於「沉迷成癮」：點預防同戒甩鋪癮？最重要改變一樣嘢！追星都算成癮？► 即睇