終於到美團(03690)公布舊年全年同第四季業績喇，虧損由2021年全年嘅235.38億人仔，大幅收窄到舊年全年嘅66.86億人仔，經營虧損亦大幅收窄至58.2億人仔。以非國際財務報告準則計量，美團錄經調整溢利28.27億人仔，2021年同期經調整虧損為155.72億元。同期收入2199.55億人仔，按年升22.8%。
　　至於舊年第四季，美團表現都唔差，虧損收窄至10.84億人仔，經調整溢利8.29億人仔好過「孖屐」預期。收入601.29億人仔，升21.4%。經營虧損7.32億人仔，2021年同期經營虧損50.06億人仔。
　　另一點要留意嘅，當然係美團嘅新業務表現。經營虧損由2021年嘅359億人仔，收窄到舊年嘅284億人仔，同時經營虧損率收窄36.6個百分點到47.9%。董事長王興喺業績發布會上確認，公司喺香港嘅外賣平台即將登場，稱「會好快喺香港推出全新品牌」。佢重申，香港係一個多語言的市場，加上飲食習慣與內地相似，可以用於探索國際市場作準備。不過，他強調當前海外市場並唔係集團業務發展核心。
　　就咁睇呢份成績表，美團表現算做得唔錯，不過今日股價照樣下跌，好大程度同騰訊(00700)分派股息嘅消息有關。大家仲有印象嘅話，騰訊曾經宣布以實物分派美團股份嘅方式派付中期股息，並且喺上星期五(24日)已經派發美團B類普通股。緊隨實物分派完成後，根據美團喺2月28日已發行股份總數計算，騰訊喺美團嘅持股比例按一股一票基準，將會減少至約1.7%。騰訊藉今次派息，變相減持美團股份，當然令到美團股價好波動。
　　美團走勢唔係好強，上星期五唔好講50天線，就連3月6日高位146.5銀都突破唔到，加上成交額唔算太高，見到「孖屐」對佢信心唔係好大。如果嚟緊一、兩日又跌穿10天線，好大可能跌番落去年內低位122.1銀，無貨嘅朋友可以等股價回到125銀樓下先掃貨。

《編者按》本欄搜羅即市傳聞，惟消息未經證實，《經濟通》亦不保證內容之準確性。

樂本健【秋日開倉26 - 27/9】保健品低至$20！► 火速行動