盈盈近日見有報道話，根據韓國央行嘅數據，截至2021年底止，南韓散戶投資外國資產嘅金額達到188億美金，而家庭持有嘅金融資產之中，股票比重佔咗20.8%，較2019年嘅15.3%急增5.5個百分點。
　　最巴閉係，GameStop散戶對撼大鱷嘅經典戰役，南韓散戶都有份，甚至有啲仲走去借錢參與，幫助美國散戶擊退大鱷。不過，咪話我話，冇錢賺嘅點會有人做丫，你估真係為正義而戰咩，個個都係見有著數想分一杯羹啫！
　　金融市場永遠係有錢大哂㗎啦，所謂「經典」只會發生一次，所以各位唔好真係以為散戶鬥大鱷可以勝完再勝！上述數據顯示，舊年南韓散戶投資外國資產嘅金額急增，今年2月俄烏戰爭爆發後，南韓散戶仲集體以1500萬美金去撈俄羅斯股票ETF，真係唔知個「死」字點寫，反過嚟就印證散戶始終係散戶！
　　道指喺今年1月5號創36952點歷史新高；標普500就早一日創4818點新高；納指綜合指數更早喺舊年11月22吨號創16212點新高，依家咪全部碌哂落去囉！高位接哂火棒，唔叫散戶叫咩？另外，《彭博》引述韓國證券部門Korea Securities Depository嘅統計話，南韓散戶淨係喺今年5月就買入總值10.4億美金嘅Tesla(相當於市值1.58%)，第二位係蘋果，南韓投資者持倉48億美金。
　　不過，Tesla同蘋果分別喺4月5號同3月30號，喺1152同179美金見頂後係咁跌，就算以上星期Tesla彈到792蚊，蘋果彈到151蚊，但美國已經進入加息周期，馬斯克仲睇淡經濟前景，呢兩隻科技股今年走勢都唔會好得去邊。南韓嗰邊仲有「蟻神」(即係我哋講嘅路人甲乙丙股神)出書教人投資，雖然唔會亂吹，凡此種種都反映環球股市勢危！《任盈盈》

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇